‘Street aides’ gipaluyuhan

96

Davao City – Gikalipay sa mga dispatcher kun street barker ang plano karon sa City Transport and Traffic Management Office (CTTMO) nga pag-organisa kanila diin sila himoong opisyal nga street attendants.

Sumala ni Jomar Villarta, 21-anyos, residente sa Bago Aplaya ning syudad, dakung tabang kini sa pang-adlaw-adlaw sanglit kini mao na iyang panginabuhian.

Dugang ni Villarta nga isip dispatcher, maayo kini nga lakang diin aduna na unya silay katungod nga han-ayon ang paghulat sa mga pasahero dili sama karon nga magpaka-aron ingnong pasahero panahon nga adunay mga awtoridad aron dili madakpan.

“Okay ni siya para ma-guide ang mga pasahero ug maplastar og tarong kay naa man guy kasagarang mga pasahero ang mangutana nga wala kabalo kung asa sila muadto unya ang driver wala masayod kay walay konduktor,” gipasabot niini.

Wala niini gilimod ang mga akusasyon batok sa mga dispatchers sama sa pagpang-tsansing sa mga pasahero ug ang pagpanukot panahon nga dili hatagan og tip sa mga drivers.

“Dili malikayan nga naa man gyod (mga reklamo) kay usahay magunitan ang kamot (sa pasahero) ug kung kursunada gyod ang dispatcher masuko gyod pag dili hatagan pero dili man tanan,” matud ni Villarta.

Gani kung mahinayon man ang pagpormalisa kanila, motuman sila sa mga obligasyon isip mga street attendants kun assistors niini.

Kasamtangan nagpadayon karon ang pagtoon sa CTTMO may kalabutan sa pag-organisa sa mga dispatchers diin plano nila nga iduso kini nga ideya ngadto sa Sangguniang Panglungsod sa syudad sa Davao.

RadyoMaN Jason Amisola

Facebook Comments