Davao City – Dakung uyon si Davao City Association of the Barangay Captains (ABC) President Edgar Ibuyan, Sr. nga pabug-atan ang silot sa mga kalalakin-an nga magbinastos sa mga kababayen-an samtang maglakaw sa kadalanan.
Gisugilon ni Ibuyan nga takos ang mga kababayen-an sa respeto busa may rason nga pabug-atan ang silot sa mga lalake nga magbinastos aron magsilbing leksyon kini ngadto sa tanan.
Supak si Ibuyan sa rason sa uban nga dili por que mi-uban sa fashion ug sa uso sa istilo sa panamit ang mga babaye, basta-basta na lamang silang bastoson na tungod lamang sa sobra ka sexy nga gisul-ob niini.
Wala’y nakitang rason ang pangulo sa mga kapitanes denhe sa siyudad aron ihan-ok ang basol ngadto sa mga babaye nganong adunay mga lalakeng magbinastos sa mga babaye.
Dugang sa kapitan nga panahon na aron ma-korehir ang sayop nga pagsabot diin ang babaye gibuhat lamang alang sa lawasnong katagbawan sa lalaki kun sexual objects, kon dili siya kadtong matuod nga kaabag sa kinabuhi.
RadyoMaN Joel Viray
