Davao City – Dayag kaayo nga dili pa andam ang mga lokalidad kinsa nagmagahi sa pagpasulod sa mga Locally Stranded Individuals (LSIs) gumikan ra usab sa kakulang sa kapabilidad diha sa pakigbatok sa coronavirus disease kun COVID-19 maong wala una nila ablihi ang ilang mga borders niadtong natanggong nga mga residente.
Matud ni Mindanao Development Authority (MinDA) spokesperson Prof. Adrian Tamayo, posibleng nalisdan sa health protocol management kontra COVID-19 ang mga lokalidad hinungdan nga padayon nilang gisirad-an ang ilang pultahan alang sa mga residente nga pila na ka bulan nang nakulgot sa ubang mga dapit nunot sa implimentasyon sa Enhanced Community Quarantine (ECQ).
Hinoon, dugang ni Tamayo, dili makonsidera nga usaka porma sa diskriminasyon ang hukom sa mga LGUs nga dili una nila papaulion ang ilang katawhan nga naipit sa ubang lugar.
Dili makunsidera nga extreme measure ang border control hinonoa, temporaryo lamang nga aksyon ug nga sa tukmang panahon, katugtan ra sa gihapong makapauli ang mga stranded residents aron makauban na nila ang ilang gikamingawan nga mga miyembro sa ilang pamilya.
Ang pagpalambo sa kapasidad sa proteksiyon sa panglawas, pagbaton og personal protective equipment ug efisyenteng pagdumala sa quarantine protocols maoy angay tutukan sa matag lokalidad alang sa balansyadong pagpanalipod ug tratamiento sa ilang mga distressed citizens, panapos ni Tamayo.
RadyoMaN Joel Viray
