Davao City – Gikalipay sa usa ka estudyante ang balaod sa paghimong permanente sa paghatag og discount sa pamasahe alang sa mga estudyante nga nagasakay sa mga pampublikong mga sakyanan.
Sa interbyu sa DXDC RMN Davao kang Fahima Duyag, usa ka college student nga taga Mati, Davao Oriental, gisaysay niini nga dako kini og tabang kaniya labi na usab sa mga working students aron makatipid labi na nga aduna pay laing mga bayronon sa eskwelahan.
“Dako kaayo ni nga tabang sa mga estudyante kay unang una, aside sa mga gastuhonon sa school like tuition fees, school projects, at least man lang makuhaan gamay ang mga galastuhon sa school,” saysay ni Duyag.
Subay sa Republic Act. No. 11314 nga bag-ohay lamang gipirmahan ni Presidente Rodrigo Duterte, mandatory na ang paghatag og 20% discount sa estudyante basta aduna lamang kini mapakita nga school ID o enrollment form nga suportado sa government-issued identification document.
Nahilakip sa maong balaod ang tanang mga pampublikong transportasyon sama sa bus, jeep, taxi, tricycle, tren, eroplano ug uban pa.
Samtang, mamahimo usab nga manubag ang paggamit og peke nga school ID o dokumento aron lamang maka-avail sa maong discount.
RadyoMaN Kirby Manzon
