Davao City – Kadayawan Festival tinuig kining ginaselebrar sa mga Davaoeños tungod sa abundang grasya o ani sa lungsod ug pagpakita nga taliwala sa nagkadaiyang kultura, panlantaw, itsura ug pagtuo ang tanang taga-Davao nagkahiusa.
Kasaulugan usab kini sa kasumaran sa ‘unbreakable bond’ nga namugna diha sa atong onse ka mga tribu sa Davao, ang Ata, Iranun, Kagan, Klata, Maguindanaon, Maranao, Matigsalog, Ovu-Manuvo, Sama, Tagabawa ug Tausug.
Ang Davao River o ang Bangkerohan River maoy nagsilbing sentro sa pagbinaylo-ay sa atong mga tribu sa ilang kaugalingon nga mga produkto ug pagkinabuhi.
Sa ika-34th Kadayawan Opening atol sa Subang Sinugdanan (Tribal Fluvial Parade) ug Panagtagbo (Tribal Convergence) atong nasud-ong ug nadungog mismo ang orihinal nga performances ug ang reenactment sa makasaysayanon kun historic nga panagtagbo sa onse ka mga tribu sa Davao.
Gisaysay ni event chair Harold Quibete nga ang mga tribu nagdala gayod sa ilang kaugalingong mga kagamitan ug produkto nga maoy ilang ginapasigarbo.
“We wanted to highlight and we wanted to go to basic that this celebration is all about them. Ang atong role dinhi is to hype up ang celebration, mutabang tang mga Kristyano nga ingon ani gyod diay ang backbone of culture nga naa ang Davao City. It’s very colorful, it’s very reflective of the many icons that we have, vibrant gyod gani kaayo ang cultural heritage sa Davao City,” sumala ni Quibete.
Kada-bulan sa Agosto, buhong kaayo ang syudad sa durian, mangosteen, lanzones ug rambutan, matud pa sa bise-alkalde sa Davao nga si Sebastian “Baste” Duterte kinsa nangulo sa Grand Opening sa Kadayawan nga angay kining i-share ngadto sa mga bisitang muduyog sa syudad niining bililhong selebrasyon.
“Kining dakbayan nato sa Davao atoa ning balay. Dili man ta blood relatives but we are brothers and sisters as Davaoeños. Kini ang atoang panimalay, ampingan nato ug dawaton nato ang atoang mga bisita. Show them our hospitality and our values as Davaoeños,” matud niini.
Si Datu Carlito Guinto, deputy mayor sa Matigsalug tribe nagbutyag nga lig-on gihapon hangtod sa pagkakaron ang koneksyon sa 11 ka tribu bisan kun pila sa ang nilabay tungod kay gugma gayod ang ilahang gipatigbabaw sa matag usa ug kini padayon nilang ginatudlo sa bag-ong henerasyon aron dili mahanaw ang ilang tradisyon ug kultura.
“Kaming onse ka tribu dinhi sa Davao aduna miy maayong pagsinabtanay gyod, nagkahiusa sa pagsandurot sa matag-usa kanamo nga walay mga bikil. Sa mga produkto, aduna silay gidalit kanamo ug adunay sab miy gidalit sab kanila. Kita ninyo diha sa Subang Sinugdanan maoy nay dili kalimtan gyod sa matag tribu,”
Gawas sa onse ka mga lumadnong hut-ong sa katawhan, nindot usab mahinumdoman nga ang Davao hulagway gayud sa managkalahi apan nagkahiusa nga pundok sa mga lungsuranon gilangkuban dili lamang sa mga lumad, kon dili, lakip na usab ang presensiya sa mga Christian settlers kun mga migrants ingon man ang nahimong papel sa gitawag nga ‘Bangsa’ kun Moro nation nga denhe usab nanukad sa rehiyon sa habagatan.
Matuod gayud nga ‘Life is Here’ dinhi sa Davao. Daghang salamat sa atong 11 ka mga tribu who made our past so vibrant nga kung mubalik-lantaw kita, dili black-and-white o sepia ang atong makita, kon dili, usa ka mabulukong sinugdanan kini kanatong tanan.
Alang sa Kadayawan 2019 Special Coverage, RadyoMaN Aimee Guinta, Tatak RMN!
