Davao City – Gitimbang-timbang karon sa usa ka transport group ang ilang posibleng pagduso pagbalik sa petition sa fare increase ugaling ma-obserbahan niining magpadayon usab ang pagtaas sa presyo sa petrolyo.
Sa pakighinabi sa DXDC RMN Davao kang Maning Duran, ang presidente sa Southeastern Mindanao Diversified Drivers Operators Cooperative (SEMDDOC), gisaysay niini nga ilaha usab nga ginabalanse ang subling pagduso sa P10 minimum fare tungod kay sila mismo maapektuhan usab niini ingon man ang ilang mga pamilya.
“Atong plantsahon, timbang-timbangon nato kay basin og kinahanglanon na pud. Pero tan-aw nato nga pwede pa nato hugtan ang atong bakus nato, hugtan nato kay kini bayang pagtaas sa pamasahe, apil baya tang operators maapektuhan gihapon niana.” sigun ni Duran.
Una nang gibutyag sa SEMDDOC president sa DXDC RMN Davao nga andam nilang iduso pagbalik ang fare increase petition kung gikinahanglan labi na nga laing oil price hike na usab ang gipatuman dili pa lamang dugay.
RadyoMaN Kirby Manzon
