Tukuran, Zamboanga del Sur – Gibati og tumang kahadlok ang kapin 700 ka mga estudyante sa Navalan National High School sa lungsod saTukuran niining probinsya sa Zamboanga del Sur human matud pa nasudlan og dautang espiritu ang subra pulo ka mga estudyante.
Sigon ni school principal Benjamin Juaton, kalit na lang matud pang natumba, mikirig ug ang uban na-usab ang tingog rason nga naghinilakay og nakuyawan ang ilang mga classmates niadtong byernis sa buntag.
Dali usab gitawagan sa tulunghaan ang mga tinugyanan sa Rural Health Unit ug nipasabot kini nga ang gibati sa pipila ka estudyante dala sa kalisang apan aminado usab nga dunay tinun-an nga dili mapasabot sa medical nga aspeto ang gipakitang lihok niini.
Sumala ni Maria Rose Montenegro, ang OIC, Navalan National High School, magpahigayon gilayon og santos nga misa nga sundan sa blessing sa tibuok tulunghaan alas 9:00 karong buntag.
Kagahapon usa ka estudyante ang gipapa-uli dihang kalit nga natumba aron malikay nga mosangpot pa unya sa pagka-possess nga estudyante.
Gitoohan sa mga estudyante nga gikan sa mga kahoy nga giputol ang mga dautang espiritu nga nisulod sa lawas sa mga biktima.
