Gina-kuwestyuon karon sang Sanguniang Bayan sang banwa sang Concepcion ang gina-obra nga mga balay para mga pumoluyo sang nasambit nga banwa biktima sang bagyo Yolanda sang Nobyembre 2013.
Ini bangud nga halos apat ka tuig na ang nakaligad sang ginsuguran ang proyekto kasunod sang paglaslas sang bagyo Yolanda apang wala pa ini sa gihapon natapos magluwas pa nga substandard ang pag-obra.
Ang nasambit nga housing project nahamtang sa Barangay Bacjawan Sur kag Bacjawan Norte, Concepcion kag ginapatigayon sang National Housing Authority ukon NHA.
Kapin 1800 ka mga balay ang gin construct kon sa diin ang nasambit nga proyekto may budget nga 290 million pesos.
Angut sini, nagpalayag sang iya privilege speech si SB Member Mark Ruffin VillaruZ, chairman sang peace and order kag public safety angut sa nasambit nga proyekto nga substandard kag tuman na ka delay .
Iya man gin dugang nga makatatlo ka beses nga nga ginpatawag sang Sangguniang Bayan ang NHA kag HERCAR BUILDERS kon sa diin nagpasalig ini nga tapuson sa natalana nga adlaw ang proyekto apang wala matuman.
Bangud sini, plano naman nga igapatawag sa sunod nga session ang NHA kag Contractor para masabat ang mga pamangkot.
