TACLOBAN CITY – Nagpahinumdom an Commission on Elections (COMELEC) nga buwas nga adlaw huwebes, November 29 an deadline para han substitution han mga kandidato.
Ha interview han RMN kan COMELEC Regional Director Nick Mendros, buwas nga adlaw nala hira makarawat han substitution para ha official nga candidate han usa nga political party o koalisyon.
“This is only in cases of withdrawal, death and disqualification. An death ngan disqualification bisan san-o pwede pero an withdrawal yana la nga Nov. 29.”
Dugang ha pamahayag ni Mendros, ha huwebes na an deadline para an ngaran han substitute nga kandidato in mai-imprenta ha official ballot.
Pagkatapos han Nov. 29 nga deadline siring han COMELEC pwede pa balyuan an usa nga kandidato pero ha kapareho niya nga apilyido tubtob midday han eleksyon.
Samtang, ha January 13, 2019 na magtitikang an election period ngan pagtikang han gun ban.
