Subversion Law gisupak

Davao City – Nabalaka ang Sentro ng mga Nagkakaisa at Progresibong Manggagawa sa pagbanhaw pag-usab sa Anti-Subversion Law dinhi sa nasud sa Pilipinas.

Sumala ni Sentro Davao Coordinator Michael Ybanez, dili maayo buhion pag-usab ang kontra sobersyon nga balaod tungod sa mapait nga kasinatian sa nakalabay’ng rehimeng Marcos.

Matud ni Ybanez, adunay dakung posibilidad nga dili lamang ang CPP-NPA-NDFP maoy maigo sa maogn crackdown apan lakip na usab ang mga magprotesta sama sa ilang organisasyon.


Segun ni Ybanez, prone kaayo sa abuso ang Anti-Subversion Law kay bisan og dili rebelde, ang pundok sa mga militante pwedeng akusahan nga nakigbatok gumikan sa pagyagyag sa ilang gibati kontra sa gobyerno or sa estado.

Supak sa batakang balaud ug sa demokrasya ang reglamento kontra subersyon kay ang maong balaud dayag nga mupatay sa kagawasan sa pagsulti sa mga tawong adunay lehitimong reklamo batok sa kagamhanan.

Nagduda si Ybanez nga malagmit adunay dautan ug malisyoso nga tumong ang Department of Interior and Local Government (DILG) kun nganong buot niining mabuhi pag-usab ang balaud kontra niadtong buot lumpagon kining gobyernoha.

Kung aduna ma’y dapat unahon sa pagsulbad kana mao ang kalisud ug ang pagtapos sa sistemang End of Contract kun ‘Endo’ sa nasud ug dili ang pagputol sa katungod sa mga kritiko sa estado nga makapadayag sa ilang kaligutgot ug kahigwaos.

RadyoMaN Joel Viray

Facebook Comments