Davao City – Matag adlaw hasol gyod sa riding public ang grabe kaguot sa trapiko sa kaulohang Manila busa dili malikayan nga ma-late sa trabaho ang katawhan.
Dinhi sa Davao City, usa sa gitudlo nga rason sa paghuot sa trapiko sa siyudad mao ang presenteng mga proyekto sa Department of Public Works and Highways (DPWH), Davao City Water District (DCWD) ug sa City Engineer’s Office (CEO) gawas nga gagmay ang mga dalan.
Pero kumento ni Southeastern Mindanao Diversified Drivers Operators Cooperative (SEMDDOC) president Maning Duran, dili malikayan ang pagguot sa trapiko karon tungod kay dala kini sa pag-uswag sa ekonomiya sa siyudad.
Base sa datos, matag bulan mukabat sa 5,000 ka bag-ong sakyanan magdagan sa kaulohan nga nagpasamot sa grabe kaugot sa trapiko sa National Capital Region (NCR).
Segun ni Duran, hangtud dili kontrolahon ang pagpalit og sakyanan bisan og walay parking area magpabiling numero unong labad sa ulo sa kagamhanan ang problema sa trapiko gawas kun dunay subway himoon.
Subay sa talaan sa Land Transportation Office (LTO), anaa lang sa 18% ang Public Utility Jeepneys (PUJ) nagdagan sa kadalanan ikumpara sa kapin 50% sa pribadong mga behikulo.
Ug kini nagpasabot nga mas dakong kontribusyon sa kaguot sa trapiko ang mga pribado itandi sa mga PUJ busa gibarugan sa pangulo sa SEMDDOC ang pagkontrolar niini.
Dugang ni Duran, kung mahuman ang Davao Coastal Road ug Railway System Project sa Mindanao, dako kining tabang sa pagtuldok sa problema sa trapiko sa dakbayan lima ka tuig gikan karon.
Ug kung mahikutar na unya ang mga proyekto, hayan dili na masusama sa kaulohan ang Davao City gumikan tawhay na man unya ang dagan sa trapiko sa siyudad pag-abot sa 2022.
RadyoMaN Joel Viray
