Mismo si Davao Del Sur Provincial Police Office Director Police Col.Giuseppe Geralde ang nagtunol sa mga solar lights ug sa mga bakal nga pagataroan sa mga suga ngadto sa mga sakop sa Revitalized Pulis sa Barangay sa miaging adlawa.
Nasayran nga ang pondo nga 90 mil ka pesos nga maoy gipalit sa solar lights ug sa mga poste gikan sa pondo sa National Task Force to End Local Communist Arm Conflict kon NTF ELCAC.
Gawas niini, nagtunol usab si Geralde og kagamitan nga patubig nga mukantidad tanan og 40 mil ka pesos sa alang sa katawhan sa Barangay Darapuay, Bansalan pinaagi sa RPSB Davao Del Sur.
Gikalipay sa Provincial Director ang naasoy nga mga proyekto kay pinaagi niini makabaton na og kahayag sa kadalanan ang katawhan sa kabukiran gawas nga patubig nga ila usab nadawat ug pinaagi niini malisdan na ma-impluwensiyahan ang mga namuyo sa hilit nga mga lugar sa probinsiya sa Teroristang CPP-NPA-NDF.
Dugang sa Opisyal, ang nasampit nga mga proyekto nagpakita lamang nga ang RPSB, kapulisan ug ang gobyerno wala nagpasagad sa serbisyo ug proyektong kalamboan nga ilang gikinahanglan.
Nasuta, ang RPSB usa ka inisyatibong program sa Rehiyonal nga buhatan sa kapulisan pinaagi sa Executive Order #70 pinaagi sa pagkatag sa puwersa ngadto sa kabukirang bahin sa ingon masanta na sa hingpit ang insurhensiya sa probinsya.
RadyoMaN Joel Viray
