Supak si PRO-7 Director Jose Mario Espino sa sugyot sa Presidente sa Cebu Federation of Beat Journalists kun CFBJ nga is Elias Baquero nga inspeksyunon sa mga sakop sa media ang mga pulis sa di’ pa sila molusad og anti-illegal drug operations aron malikayan ang pagtanom og ebidensya .
Matod ni Baquero nga inay pakuyogon ang mga sakop sa media sa mga operasyon sa kapulisan, angay nga tugotan sila nga masusi ang mga pulis nga molusad og mga operasyon lakip na ang mga armas ug ubang gikinahanglan nilang gamit .
Apan nagkanayon si Espino nga dili trabaho sa usa ka media practitioner ang pag-inspect sa mga pulis inay trabaho kini sa commander nga seguruhon ang iyang mga tawo nga di’ magdala og bisan unsa .
Hinoon, gihangop ni Espino ang ideya nga anaa na ang presensya sa media atol sa mga operasyon sa kapulisan diin magsilbi sila isip mga testigo .
