Davao City – Walay foul play ang giingong pagsulay og pagpakamatay sa staff ni SAP Christopher “Bong” Go sulod mismo sa stock room sa opisina sa OSAP sa may Veloso St., Brgy. 20-B Bo. Obrero, Davao City kagahapong adlawa.
Kini ang gikumpirma ni Sta. Ana PNP station Commander PCI Michael Uyanguren atol sa interbyu sa DXDC RMN Davao.
Matud ni Uyanguren nga ginahulat nila karon ang resulta sa Firearms and Explosives Office sa gisumiteng armas ug bala aron masuta kung kinsa ang nanagiya sa gigamit nga .38 nga pusil nga adunay serial # ZL99769.
“Mao pa ni atong gi-verify sa firearms and explosives sa office ginahulat pa nato ang result,” sumala ni Uyanguren.
Sumala ni Uyanguren nga nagpabilin pa gihapon sa ICU sa San Pedro Hospital ang maong biktima.
Wala pa nasuta kung unsay hinungdan sa pagsulay sa pagkutlo sa kinabuhi niini.
“So far wala pa tay nakitang motibo nganong gibuhat niya ug sa trabaho wala pod siyay kaaway maayo pod iyang record,” sumala ni Uyanguren.
Tambag ni Uyanguren ngadto sa tanan nga kung aduna may mga miyembro sa pamilya nga adunay mga problema o niagi’g depression dili kini balewalaon.
“Kung naay miyembro sa family nato nga unusual na ang ilang mga lihok o mga naay mga grabeng problema pwedi ta muadto sa mga proper agencies like CSSDO for counseling o pwedi pod pwedi sa mga doctors nga mu-cater og mga pasyenteng niagi’g grabeng stress o problema,” sumala niini.
RadyoMaN Aimee Guinita
