Nauna nang gisaad ni Duterte nga siya mismo ang mopili sa mga kapitalistang kompanya nga tugotang moangkon sa mga kayutaang lumad sa Surigao, Davao ug ubang dapit sa Mindanao.
Nagpasabot lamang kini sa pag-aprubar sa mga pasistang pamalaod nga mopasayon, mopadali ug ligal nga motabon pinugsanay nga pagpanghakop sa nahibiling kayutaang pangpubliko ug mga yutang may nagtikad na pero walay titulo.
Gikinahanglan ni Duterte ang sistemang pederal aron mapalig-on ang sistemang warlord sa mga rehiyon, siguradong makonsentra, makontrol ug ma-pribatisa ang kayutaan ug hingpit masilbihan ang interes sa imperyalismo, pyudalismo ug burukrata-kapitalismo.
Imbes libreng ipang-apud-apod alang sa kinabag-ang mag-uumang walay yuta o kulang sa yutang matikad, ang pormula ni Duterte mao ang landgrabbing alang sa kabulahanan sa pipila, sama sa TVI, DACON, Philex Mining ug warlords sama nilang Cerilles ug Babasa.
Aron mapadali ang public land conversion sa tibuok nasud ngadto sa pribadong pagpanag-iya, kinahanglang tingalon ang nasud ug katawhan pinaagi sa pederalismo, tamla nga Kongreso ug Korte Suprema ug martial law. Busa, mapaabot nato ang dugang paggrabe sa pasismo sa tibuok nasud ug, kaluha sa pasismo, ang pagpasilaob sa reaksyonaryong gubat batok sa katawhang Pilipino.
Ang sulbad sa krisis sa kaatrasado, kabangkarote ug pagkaitoy sa nasudnong ekonomiya ug pulitika ubos sa pagpangulo sa estadong semikolonyal ug semipyudal dili gyud masulbad sa martial law, pederalismo, Tokhang ug all-out war sa rehimeng US-Duterte.
Sa pikas bahin, nagasugnod kini sa kaylap nga pagsukol ug dugang diskuntento sa katawhang Pilipino ug pagpanghimaraot sa progresibong mga pundok sa katawhan sa tibuok kalibotan.
Gisalikway, giyaga-yagaan ug padayong gibastos sa rehimeng US-Duterte ang gipresentar nga programa sa Communist Party of the Philippines ug National Democratic Front of the Philippines aron matukod ang pundasyon sa lahutay ug makatarunganong kalinaw nga nakasentro sa pagpatuman sa tinuod nga reporma sa yuta ug nasudnong industriyalisasyon.
Hinungog nga gitakmag gilayonsa itoy nga rehimen ang palisiya sa neoliberalismo nga reseta sa IMF-World ug ubang multilateral nga mga institusyon sa pinansya nga napamatud-an na nga makabakol ug makatiwas sa pasyenteng mga kanasuran ilalom sa kapitalistang paghari.
Husto ug angayan lamang nga padayong gipursigi sa Communist of the Philippines sa pagmando niini sa New People’s Army sa pagpakaylap sa mga taktikal nga opensiba isip tubag sa nagkataas, nagkalapad ug nagkabangis nga pasismo sa tibuok nasud ug padayong pagpahamtang sa martial law sa tibuok Mindanao.
