Davao City – Gikondena sa Muslim community ang gihimong pagpamomba sa usa ka simbahan sa Jolo, Sulu kagahapong adlawa, Enero 27, 2019 nga gikamatay sa 27 ka mga indibidwal.
Sa pakighinabi sa DXDC RMN Davao ni Ustadz Mahmoud Adilao, regional chairman sa Ulama League of the Philippines gisaysay niini nga dugay nang gipanawagan sa ilang organisasyon nga dili kini buhaton sa mga Muslim o bisan unsa man relihiyon. Gi-angkon usab niini nga dakong hulga kanila o sa asa mang religious sector ang binuhatan sa mga terorista.
“Kanang mga bombing incident, dili ni pwede nga buhaton sa usa ka grupong Muslim o sa usa ka grupong adunay pagtuo sa Ginoo kay bawal mani sa relihiyon labi na nga madamay ang mga inosenteng sibilyan. Mao na ang pinakadako nga hulga sa mga religious sectors ang kanang mga buhat sa mga terrorists.” segun ni Adilao.
Nanghinaut usab ang opisyal nga dili na mausab ang maong insidente diin gipasabot niini nga ang maong mga dautang aktibidad nagsupak sa balaod sa gobyerno ingon man sa balaang kasulatan sa labi na sa Islamic religion.
RadyoMaN Kirby Manzon
