Davao City – Husto ang gihimo karon nga evaluation sa DSWD diha sa talaan sa mga beneficiaries sa 4Ps ilabi na nga libo ka libo diay kanila gikatahong kwestionable ang nahimong pagka-miyembro sa maong direct poverty alleviation program sa Duterte administration.
Husto lamang nga ilusad ang usaka internal cleansing process haron kadtong dili angayan, taktakon na gilayon sa hingpit gikan sa programa haron kadto lamang nga labaw’ng nanginahanglan sa asistinsya-pinansiyal sa kagamhanan maoy mabutang sa listahan ug ensigidang matabangan.
Husto lamang nga kadtong naka-apil lamang gumikan kay ‘duol sila sa luwag’ or naapil sa mga beneficiaries gumikan kay sila ‘lakas’ sa mga taga-gobyerno wagtangon na nato sa hingpit haron atong masalbar ang programa gikan sa binuang ug salawayong implementasyon niini.
Hinoon, ako nagtoo nga inay wagtangon sa hingpit ang entero anti-poverty intervention scheme, mas pa gani natong palapdan ang coverage niini or padak-an pa ang kantidad sa hinabang aron mas daghang mga pobre ug timawa uyamot nga mga Pinoy maluwas ug makalingkawas gikan sa arang kalisud nga kahimtang-ekonomikanhon karon.
Subli-on ko, dalaygon ang pilosopiyang nagpaluyo sa 4Ps gani dili ikalalis nga daghan nang kinabuhi ang direktang nausab niini. Apan dili lamang kita angay moundang sa pagtunol ug tabang: Kun buot gayud sa gobyerno nga maalibyo ang panginabuhi sa katawhang pobre, hagit sa pamunuan nga magmugna ug dugang ‘companion programs’ alang sa mga livelihood opportunities haron ang Pinoy makaantigo nga ‘mangisda, inay nga igo na lamang modawat ug isda’ gikan sa estado.
RadyoMaN June Duterte
