Davao City – Ngadto sa gobyerno, kini ang akong diyutay’ng pangaliya ug hangyo: Nga unta dili kini moundang sa pagsalig sa gahum sa kalinaw alang sa atong katawhang naggilaid gihapon karon sa tumang kasamok gumikan sa bangi sa pagtoo-pulitikal ug sahi nga ideolohiya.
Matuod nga aduna gayuy moral ascendancy ug nga aduna gayuy pupaigong katarongan o justification ang estado nga lutoson ang tanang mga kalaban sa gobyerno kun ang gitawag nga mga ‘enemies of the state.’
Apan kaluha usab niya nga kagahum mao ang pagpili sa malinawong dalan o agianan pinaagi sa peacetalks, pinaagi sa walay undang nga pagsalig nga sa panag-istoryahanay makab-ot ra gayud gihapon nato ang usaka malinawon, malungtaron ug malahutayon nga katilingban.
Ngadto sa mga nagrebelde kontra sa estado, kamo man usab adunay responsibilidad sa pagpangutana sa inyong kaugalingon kun sa padayong pagbitbit ba sa armas makab-ot sa sunod natong kaliwatan ang mas tunhay, mas hamugaway ug mas mauswagong kinabuhi.
Kun andam kitang mohimo sa maong mga aktwasyon, ako nagtoo nga dili gubat, dili pinatyanay, dili kaguliyang ang yawe sa kausaban sa atong sosyedad.
I do not believe and I choose not to believe that only chaos can bring order in our society. Ako hugot nga nagtoo nga ang kalinaw dili imposibleng damgo ug mithi ni bisan kinsa – sa kondisyon nga andam lamang ang matag usa nga mopadaplin sa atong tagsa-tagsa ka mga hardline positions haron paminawon ang mga anaa sa pikas tampi.
Kun ang mga anaa sa pikas dapit andam usab nga maminaw ug mo-atras ug diyutay, daku ang purohan nga ang panagsinabtanay atong mapundar ug ugma damlag, ang matuod nga panaghiusa ato ra gayung mabugtaw – alang sa atong mga anak ug sa mga anak sa atong mga anak.
RadyoMaN June Duterte
