Davao City- Dili na nako ikatingala pa nga adunay mga kritiko sa gobyerno mas pili-on nga didto modangop sa sabakan ug nataran sa Simbahang Romano Katoliko aron magpakitabang.
Bunga kana sa atong eksperyensya nga gani sa nanglabay’ng mga panahon, mga rebeldeng NPA gikataho nga didto man gani motago sa mga lawak sa kasimbahanan ilabi na kun ang mga lideres niini symphatetic ngadto sa kalihukan.
Dili na usab ako matingala pa nga moabot gayud ang panahon nga magkomboya na unya ang simbahan ug ang political opposition against one common enemy: Duterte.
Kaniadto bitaw, didto man nasum-ok sa monasteryo sa kamadrehan sa Sugbu si Cory Aquino diin siya gitipigan gikan sa kamot sa mga awtoridad nga nagpangita kaniya ug sa mga taga-oposisyon niadtong tungora.
Dili halayo nga masubli kadtong ehemplo ni Manila Archbishop Jaime Cardinal Sin nga nakig-alyansa sa mga soldier-muntineers, mga rebels ug opposition leaders aron pakigbatukan si Marcos niadtong higayuna.
Ang ako lang panghinaut mao kini: Nga sama sa panaad ni CBCP President Archbishop Socrates Villegas, ilang gamiton ang duha ka mga barometro kun sukdanan sa matag modangop kanila sama sa mga rogue cops or police scalawags nga matud pa involved sa extra-judicial killings sama sa pagtino una, sa sinseridad sa katuyuan ug ikaduha, ang merito kun validity sa alegasyon o testimonya sa magpatabang ngadto kanila.
Usa man gud nga sayop kun wrong move dinhing dapita malagmit mosangpot sa akusasyon nga ang kasimbahanan mamahimong daling tagoanan, sanktwaryo o pugaran sa mga dautan ug moresulta na unya nga kini ikiha nga ‘coddling of criminal elements or obstruction of justice.’
Tingali ang mahimong buhaton sa simbahan mao nga i-asistir ang mga moduol kanila nga sila mapa-ilawom sa hurisdiskyon sa atong mga hukmanan ug nga sila hatagan sa eguales nga proteksyon ilawom sa balaud.
Ubos sa atong pamalaud, kadtong mga gi-akusahan tunolan man sa iyang ‘constitutional right to be presumed innocent until otherwise proven by a competent court of law or justice.’
RadyoMan June Duterte
