Davao City – Kritikal nga aspeto sa kabag-ohan sa atong katilingban mao ang malinawong pagbalhin sa poder gikan sa tali-tapos na nga pamunuan ngadto sa bag-o ug umaabutay pa nga liderato.
Gani karong May 14, mabatonan pag-usab sa katawhan ang gahum nga mamili ug hustong mga lideres sa pinaka-ubos nga lebel sa atong sosyedad diha sa atong mga kabarangayan.
Ang eleksyon sa barangay makonsidera nga usaka mahinungdanong oportunidad aron kadtong mga walay pulos, non-performing officials ug kadtong involved sa kabuang sama sa droga, korapsyon ug pasugal ato nang hinginlan sa hingpit, dili na pabalikon ug pulihan na sa mas maayo, mas tarong ug mas masaligan nga klase sa mga new grassroots-level officials.
Talagsaong higayon usab kini haron ang atong youth sector makapamili ug ensakto haron kadtong ilang ginombrahan kaniadto apan nagbudhi ug wala magtuman ug husto sa ilang mandato hukasan na sa ilang pangatungdanan ug haron mabakwi nato ang kahingawa sa katawhan kinsa wala ganahi kun wala makauyon sa matang sa ilang pagpanerbisyo.
Dili nato kini saya-sayaon kun sayangon kini nga higayon sa pagpatuman og undanong kausaban pinaagi ning atong bililhong kagahum nga anaa sa atong tagsa-tagsa ka mga kamot, sa tumoy sa atong mga ballpen ug sa atong sagradong balota.
Atong gamiton kini nga impluwensiya haron ma-instalar ang mas responsive ug du-ol sa atong dughan nga matang sa liderato haron mouswag gayud ug taman kining atong katilingban.
Salmotan nato ang May 14 political exercise, aktibo nato kining ubanan sanglit kining atong panggobyerno iya gayud sa tawo: Nanukad sa tawo, alang sa tawo ug gitumong para sa yanong tawo.
RadyoMaN June Duterte
