Davao City – Mga kasama, angay gayud natong himoong dakung leksyon kun pagtulun-an ang nahitabo karon sa Boracay.
Atong himoong kapanukaran ang realisasyon nga kun dili diay nato panggaon ug manggaron ug maayo kining atong nag-inusarang kinaiyahan, mahitabo gayud diay ang posibleng senaryo diin mahugaw kini ug madaut kitang tawo.
Ug kay konektado man kita sa atong kalikupan due to the cycle of nature and of biodiversity, kun unsay dangatan sa atong kalibutan – kabukiran, kalasangan, kasapaan, kabaybayunan ug kadagatan – malagmit kana usab ang atong kapaingnang rumbo ug destinasyon.
Husto unya ang panultihon sa mga bugoy: ‘Our foolishness will go home to our body’ – meaning to say, kun dauton nato kining atong kinaiyahan, kita ra usay maunay sa atong kaugalingong tari sa pagpabaya ug kabuang.
Atong seguraduhon nga magpabiling hinlo, hapsay, tunhay ug lunhaw kining atong mga beach resorts, mga favorite tourist destinations ug uban pang maanindot ug matahom nga mga suroyanan sanglit daku kining gasa sa Kahitas-an kanatong tanan.
Stewards lamang kita, busa daku natong tahas ug kargo mao nga ayuhon, amomahon ug mentenahon nato kini kutob sa atong mahimo haron ato usab kini nga ikabilin ngadto sa atong sunod nga mga kaliwatan: Usaka mauswagon ug hilway nga kinaiyahan ug kalibutan alang sa hingpit nga katagbawan natong tanan.
RadyoMaN June Duterte
