Davao City – Karong adlawa, subli nato nga gi-rekognisar ang bililhon ug kritikal kaayong papel nga gihuptan sa kababayen-an sa entero nasud ug kalibutan.
Karong adlawa ug sa tanang panahon sa atong kinabuhi, atong gidawat nga mahinungdanon kaayong mahatagan ug igong bili ang responsibilidad ug oportunidad sa women sector diha sa pagpabarug sa atong mga banay, komunidad, nasud ug entero kaliwatan.
Si Nanay mao gayud ang matuod nga suga ug inspirasyon sa panimalay ug sa mga higayon nga ang inahan mapugos mobiya sa usaka gubot nga panimalay aron manimpalad sa disyerto ug kamingawan pananglit sa Tungang Sidlakan o bin ba kaha aron likayan ang pagpangdagmal ngadto kaniya, ang kahayag sa kaugmaon sa mga kaanakan mamahimo na unyang mosukarap sa tumang kangitngit nga walay sama.
Mag-unsa na man kitang mga kalalakin-an kun wala silang kababayen-an nga atong makauban sa kalipay o kalisdanan, sa maayong panglawas o taliwala sa balatian, sa mga pagsulay ug kadaugan?
Unsa may bili o balor ba kaha sa atong mga kadaugan kun wala kitay kapikas sa kinabuhi ug pamilyang gitagan-an nato sa tanan natong mga pagpasingot sa matag adlaw’ngt tanan?
Subli-on ko, ang kababayen-an gasa sa kahitas-an kanatong tanan: Ato silang panggaon, amomahon, higugmaon, panalipdan ug tahuron.
Dili nato sila pasipad-an, dili nato sila tugtang moatubang sa mga hadla sa kinabuhi nga mag-inusara, tabangan nato sila, palig-onon nato sila, ubanan nato sila bisan sa mga panahon nga sila lisud sabton ug higugmaon.
Mangaliya kita sa Kahitas-an nga sa matag adlaw, Iyang pandungan sa iyang hamiling dugo ug proteksyon ang atong mga inahan, mga iyaan, atong mga apohan ug mga igsoong babaye nga sila magpabiling magmatinud-anon, lig-on sa ilang personalidad ug sa kanunay modangop sa Kalangitan diha sa inadlaw-adlaw’ng paglakat ibabaw ning kalibutan.
To all the women in the world, long live to you all and may the heavens continue to strengthen your faith and your heart against all the trials and troubles of this world.
God bless you all!
RadyoMaN June Duterte
