Davao City – Kun ako ang pasulti-on, gikinahanglang mag-istorya ang mga taxi operators ug ang ilang mga taxi drivers haron dili mosangko sa buruka, walay pagsinabtanay ug malagmit pa gayud nga pasakitay ang ilang diperensiya diha sa taxi fare recalibration ug ang pagsaka sa rental fee kun boundary matag adlaw sa mga taxi units.
Una, angay masabtan sa mga taxi operators nga samtang legal o lehitimo ang ilang pangayo nga usbaw gumikan sa pagtaas sa presyo sa tanang palaliton sama pananglit sa krudo o gasolina, mga piyesa kun spare parts sa mga sakyanan plus ang ‘cost of acquisition’ sa mga gimando nga taxi-hailing device ug dashboard camera, angay nila kining ibalanse sa real nga sitwasyon sa mga drivers.
Angay madawat sa mga operators nga dili mosalir ang ilang negosyong panakayan kun walay driver nga mogunit sa manibela sa ilang mga units. Denhe gikinahanglang i-harmonize sa mga tag-iya ang ilang gusto ug sa kabubut-on usab sa mga yanong namasada lamang.
Ikaduha, angay masabtan sa mga driver nga kun wala ang mga operators, unsa may ilang panginabuhian aron ibuhi sa ilang mga pamilya?
Wala nagpasabot nga como operator, dautan na kini: Adunay mga salawayong tag-iya’g yunit apan mas daghan gihapon ang nagtinarong ug adunay pagpakabana sa kahimtang sa mga driver nga ubos sa ilang pagmando.
Gikinahanglan lamang nga ang duruha ka sektor magtagbo ug idiskuti kun unsaon sa pagpangita sa gitawag nga ‘win-win solution’ ug dili kay ‘daw-lims’ lamang ang si bisan kinsa sa ilang duruha.
Mas malipay kaming mga pasahero ug sumasakay kun kamo mag-dayalogo sa labing madaling panahon haron ang among pag-navigar matag adlaw dili intawon madiskaril!
Kun ato lamang kining buhaton ug kun andam lamang ang matag usa nga maminaw sa pikas nga ka-istorya, walay imposibleng suliran nga dili nato maresolba ug ma-distrungka sanglit usa ra man ang atong rumbo ug tinguha: Ang makapangalagad sa riding public at the same time, mo-ginansiya ug diyutay haron hilway nga mabuhi sa tinarong nga pamaagi.
RadyoMaN June Duterte
