Davao City – Wala na tingaliy makatandi pa sa kaisog sa mga trabahanteng Pinoy kinsa bisan sa tumang kaguol ug kawalay kaseguruhan sa pagpanimpalad abroad, moadto ug moadto lamang sa gihapon gumikan intawon sa nag-umido nga damgo sa ilang mga dughan: Ang mas maayong kaugmaon alang sa ilang mga pamilya bahala na kun sila maoy magkalisud.
Dili na nako maihap pa sa tudlo ang akong nadunggan nga mga sugilanon sa mga bag-ong bayani diin ilang gi-atubang ang kadelikado ug kapait sa pagpanarbaho gawas sa nasud, ang dili matukib nga kasakit, ang tumang kaguol, ang nanghingapin nga kamingaw sa ilang mga mahal sa kinabuhi bisan pa man kun anaa sila kanunay sa dili ciertong pagpanarbaho sa mainit nga disyerto, sa mabugnaw’ng mga dapit, sa mga makamatay sa kamingaw nga malagyo nga mga lugar haron lamang si Dodong ug si Inday makatungha, maka-gradwar ug haron makabaton ug mas maayong ugma.
Matag higayon nga makasagap ko’g success story, daw bayawon ko sa kalipay sa kaisog ug kakugi sa atong mga OFWs, apan matag higayon nga makadungog ko sa mga istorya sa pagpang-abusar kun pagmaltrato ug diskriminasyon sa atong mga kababayan sama nila ni Joanna Dimapilis, Melody Castro, Flor Contemplacion ug daghan pang uban, bation dayon ako ug nagsagol nga kahingawa ug kasuko.
Kahingawa kun nganong pobre man ang Pinoy ug nganong wala man siyay laing madaganan gawas ang kamangtas abroad: Wala na ba diay siyay laing kapaingnan?
Ug kasuko: Nganong wala may alternatibong matunol ang estado? Igo na lamang ba sa pagdawat-limpyo kun pagkumkom sa ilang mga palad sa dollar remittances nga padala sa mga trabahanteng atua sa gawas?
Hangtud kanus-a man nga magpabilin kitang ulipon sa ubang kanasuran gumikan lamang kay kabus ug timawa kita nga nasud?
Unsay pa may dignidad nga nahibilin ngari kanato kun ang tan-aw sa mga foreigners sa atong mga kababayen-an parausan lamang sa ilang kaibog ug dili equal partner sa kinabuhi?
Hangtud kanus-a man magpabiling nakahigot ang atong kaugmaon sa mga oportunidad nga wala denhe kay atua sa gawas?
Hangtud kanus-a?
RadyoMaN June Duterte
