Davao City – Karon nga subling banhawon ang gika-intapang ‘Tokhang’ ubos sa PNP ‘Oplan Double Barrel Reloaded’ kontra droga, gilauman sa kadaghanan nga matutukan pag-usab ug maayo ang krusada sa malangkubong pamaagi.
Ubos sa PDEA, ang gi-focusan mao kadtong gitawag nga mga ‘high-value target drug personalities’ aron pagtratar sa suliran didto gyud sa ugat-hinungdan kun pungango ning tanan ug dili dinha lamang sa sanga-sanga kun kinatumyan nga bahin nga diin makit-an ang mga gagmay’ng drug couriers, peddlers ug drug users.
Apan sa pagbanhaw sa ‘Tokhang’ sa ikatulong higayon, mas maayo tingali kun ang nasudnong kapulisan maminaw ug maayo sa timbre ug mulo sa tawo:
Una, ang survey nagkanayon nga mayoriya kun 6 sa matag 10 ka mga survey respondents dakung uyon sa drug war, kining gitawag nga ‘core believers’ sa mga palisiya sa gobyerno sama sa kampanya versus illegal drugs.
Angay konsiderahon sa atong mga police enforcers nga samtang suportado sila sa katawhan sa ilang katuyuan pagpukan sa mangtas nga bisyo sa Pinoy, anaa usab ang panawagan nga unta mas maayong dakpon nga buhi ang mga drug personalities aron makatug-an kinsa ang ilang mga kakonsabo, mga suppliers, financiers, protectors ug protectors sulod ug gawas sa law enforcement establishment.
Gawas pa niana, mas maayong ipakita sa mga awtoridad nga kadtong makaya pa ug pag-rehabilitate, dad-on sa mga rehab centers ug dili pamatyon sama nila ni Kian delos Santos, Carl Arnaiz ug uban pang EKJ victims.
Daku ang expectations sa tawo ning higayona, mao man gani nga atong gihagit ang nasudnong kapulisan nga tarongan ang kampanya, likayan ang mga kasaypanan kaniadto ug mas himoon kining krusadang nanukad sa integridad ug legalidad – ug dili taming aron gamiton sa mga scalawags nga convenient alibi kun scapegoat sa ilang nilu-og nga binuhatan.
RadyoMaN June Duterte
