Davao City – Daghan ‘ta’g mamahimong buhaton aron pagpatunhay sa kahusay ug lainaw sa atong katilingban. Kun atong ubanan ang mga security measures, daku ang purohan nga kun di man gani nato hingpit, ciento por cientong mapugngan ang krimen, at least ma-reduce kun makibhangan nato ang gidaghanon ug gidak-on niini.
Mamahimong hangyoon nato pag-usab ang atong mga tinugyanan sa balaud nga ipakita gayud sa katawhan ang ‘expanded roving’ ug kining gitawag nga ‘greater police visibility’ diin dayag gayud nga makita ug masinatian ang presensya sa mga awtoridad – down to the barangay ug purok level.
Importante gihapon kadto bitaw’ng kinaraan nga istilo diin ang awtoridad mag-patrolya gayud diha sa mga kalsada ug eskinita haron magduha-duha sa paghimo sa dinautan ang mga kriminal sa atong palibot.
Mas makaayo usab kanatong tanan kun atong pahugtan pa ang mga random surprise checkpoints sa kadalanan haron madakpan ang mga nagbitbit sa armas de fuego nga dili lisensyado kun ‘loose firearms’ haron atong mapugngan ang pagkuyanap sa kriminalidad.
Importante usab ang pagpalig-on pa ug dugang sa atong mga CCTV cameras sa tanang kritikal nga porsyon kun dapit sa atong kabarangayan haron makita gayud ang tanang mga panghitabo ug haron sayon na ang paggukod sa nakahimo sa salaud.
Sa lebel sa tagsa-tagsa nato ka mga households kun panimalay, mas maayong atong praktison kining gitawag nga ‘target hardening’ diin atong palisud-lisoron ang mga kawatan ug mga bongoton nga mo-take advantage sa atong kumpyansa.
Mas maayong mag-establisar ta’g perimeter fence, steel grills, double lock, alarm system ug uban pang early warning devices haron ang mga miyembro sa pamilya maluwas sa disgrasya ug perdisyon.
Dili kini kumpletong listahan sa mga suhestiyon, daghan pa kita’g mamahimong isugyot nga buhaton. Ang ato lamang ngari nga unta atong ma-realisar nga daku gayud ang atong expectations ngadto sa atong mga law enforcers ug mga men and women in uniform apan kita usang mga yanong katawhan aduna usay atong kaugalingong obligasyon nga panalipdan ang atong kaugalingon – antes pa man mahidangat sa atong lugar ang mga personahe sa kapulisan aron mo-responde sa call for assistance gikan sa katawhan. Stay Safe!
RadyoMaN June Duterte
