Davao City – Unsa ba ang naghupot sa seguridad sa termino sa usaka nangalagad sa gobyerno lokal man o nasyunal? Ang iya bang abilidad? Ang iya bang katakos? O ang iyang kaligdong ug kredibilidad base dinha sa impresyon kun persepyon sa katawhan ngadto kanila?
Alang nako, importante ang abilidad ug katakos apan labaw’ng mahinungdanon ang imahe kun integridad sanglit diha man unya mo-angkla ang tanan kay kun ang usaka opisyal dili na masaligan, moabot gayud ang panahon nga dili na siya tuho-an ug bisan unsa pay iyang buhatong maayo dili na unya paluyuhan sa tawo gumikan sa iyang kwestionableng personalidad o binuhatan.
Kini ang rason nganong mahinungdanon kaayong hinloan sa liderato sa Philippine National Police ang imahe niini gikan sa lain na usab nga kontrobersyal nga gikalambigitan niini: Ang Mandaluyong shooting incident.
Hagit sa PNP leadership nga dili duphan, dili tapin-an ug dili ibale-nada lamang ang mga pagkwestion sa resulta sa maong operasyon haron dili matanum sa hunahuna sa mga yanong lungsuranon nga biased kini sanglit kauban man nila ang nabutang karon sa alanganin.
Kun may mga kakulangon sa katakos ug training, dawaton nato kini ug hagiton sila si Gen. Bato nga ayuhon ang pagbansay sa atong mga tinugyanan sa balaud haron dili na masubli pa ang mabangis nga panghitabo.
Kun tinguha sa nasudnong kapulisan nga dili sila biyaan sa pagsalig sa katawhan, nan kritikal kaayo nga dawaton ang mga kasaypanan, silotan ang angay patubagon ug han-ayon pag-otro ang mga sistema, procedures, mga pagtoon diha sa pagbansay sa kapulisan haron maplastar na nato sa husto ang mga kalihukan niini subay sa ilang mandato.
Dili maayong ratsada natong kondenahon ang PNP gumikan lamang sa sayop sa pipila. Hinonoa, tabangan nato silang makabarug nga malig-on gikan sa mga lapses kun kakulangon sanglit gikinahanglan man gayud nato ang ilang pagpangalagad sa natad sa kahusay, kalinaw ug seguridad.
RadyoMaN June Duterte
