Davao City – Usa ka dakung garbo ug dungog ang padayong pagsakmit sa syudad sa Davao sa mga prestihiyosong pasidungog-nasyunal sa mga talagsaong ehemplo sa liderato niini.
Ang latest ‘National Hall of Fame’ Awards sa mga areas sa disaster risk reduction management and resiliency ug sa child protection programs pagpamatuod lamang nga sakto ang gilaktan nga direksyon karon sa lokal nga panggobyerno kalambigit sa mga prayoridad niini sa kadumalahan.
Hagit kini kanatong tanan nga gumikan ning maong award, daku gayud ang ekspektasyon sa katawhan kanato nga padayon kitang mangulo sa mga pagpaningkamot nga mas mo-uswag pa ang atong katawhan ilabi na ang atong gimanggad nga mga kabatan-onan.
Kini ang rason nganong bug-at gayud ang gisangun nga kargo ug responsibilidad dinhi sa atong mga abaga sanglit ang entero nasud padayon man sa paghangad ngari kanato silbing ilang inspirasyon, panig-ingnan kun sumbanan kun unsaon pagpadagan ang usaka epektibo, malamboon ug nagmalampusong lokalidad.
Ug samtang gitagamtam nato kining matam-is kaayong kadaugan, atong hinumdumon nga daghan pa kita’g angay pagabuhaton aron maalibyo ang masalimuot nga sitwasyon sa atong mga kabatan-onan.
Usa na dinha ang pagsalbar sa mga menor de edad kinsa padayong naglatagaw kun naglaroy-laroy nga way rumbo dinha sa delikadong kadalanan, ubos sa impluwensiya sa droga, bisyo ug barkadang dautan, usahay mohatud pa gayud sa mga batan-ong kababayen-an nga sila mahitumpawak sa kaala-otan mas gipasamot sa tumang kawad-on, kakulang sa edukasyon ug uban pang mga oportunidad.
Matuod gayud nga dili pa kita hingpit nga nakalingkawas gikan sa mga kuko sa disgrasya hangtud nga adunay batang taga-Mindanao nga nahikawan sa mas maayong ugma.
Agako nato sila, luwason nato sila sa klarong peligrong hatud sa kinabuhi diha sa kadalanan, tunolan nato sila sa pag-amping ug pag-amoma nga tingali wala nila masinatian sa tibuok nilang kinabuhi nga malagmit mao usay nagtukmod kanila diha sa kinabuhing dinautan. Let us save our children from the streets by removing the streets in their lives!
RadyoMaN June Duterte
