Davao City – May mga butang ibabaw ning kalibutan nga mamahimo natong buhaton sulod sa upat ka su-ok sa atong tagsa-tagsa ka kaugalingong mga pinuy-anan apan aduna usay mga sensitibong butang nga dili nato mahimo diha sa publiko kun atubangan sa kadaghanan.
Ang pag-inum inum dili iligal apan ang pagtagay mismo diha sa mga pampublikong lugar angayang ipatuman subay sa mga kalagdaan sama sa pag-regulate sa public drinking gumikan lagi sa sagad negatibong sangpotanan pananglit bangi kun away usahay mosangko pa gayud sa pag-ergo, sinumbagay, dinunggabay o pinusilay kun pinatyanay nga arang ka walay hinungdan.
Akong gipasalamatan si City Councilor Mabel Sunga-Acosta gumikan sa pag-atendir ning maong problema sa katawhan batok nianang mga palahubog sa kadalanan. Salamat kaayo Madame for taking the cudgel for the rest of our citizens kinsa batio’g gayud intawon ug tumang kahadlok o kabalaka everytime makaagi sa nagtapok-tapok nga manginumay sa mga eskinita o kalsada sa barangay ilabi na kun panahon sa kangitngit ug kagabhi-on.
Ug karon kay ordinansa na kini, atong hagiton ang tanang mga opisyales sa kabarangayan nga hugot kining ipatuman – ug dili kay kamo na hinoon ang mag-una nga magpabuyag ug pasaway!
Atong ipahinumdom sa tanan nga aduna bayay kabataan nga nagatan-aw sa matag natong binuhatan. Kay kun unsa gani kadtong makita o masud-ong sa bata, malagmit mao usab kana ang iyang sundon kun sundogon sanglit ang matag butang nga makita niya mao man unya ang iyang tohoan nga husto kun ensakto bisan kun daku kining kasaypanan.
Ipatunhay nato ang atong mga komunidad, ipasunod nato ang hustong mga kostumbre ug maayong pamatasan ug diha kini nato sugdan sa pinaka-ubos nga ang-ang sa atong kadumalahan: Diha sa tagsa-tagsa nato ka mga kabarangayan.
RadyoMaN June Duterte
