Davao City – Akong gi-agni ang tanan – ginikanan, mga kabatan-onan, kitang tanan – nga ubanan ang labing ulahing mga update dinhi sa RMN DXDC Davao karong adlawa gumikan sa gikatakdang Senate Blue Ribbon Committee hearing kalambigit sa kontrobersyal nga P3.5B Dengvaxia vaccine anomaly.
Sayron nato unsa ba gayud ang kamatuoran nga naglimin ning labing ulahing iskandalong nilaparo sa nasud diin dul-an 800,000 ka mga bata gikatahong nabakunahan ning experimental pa nga matang sa vaccine gihulagway unta nga ‘first vaccine against dengue’ apan nabulit na man hinoon karon sa daghang panghinaway, suspetso ug pagduda.
Aduna kahay nakakwarta sa maong transaksyon pinaagi sa gitawag nga ‘midnight or sweetheart deal’ o ‘overpricing’ diin nabutang na hinoon sa tumang kadelikado ang kinabuhi sa poco mas o menos 70,000 ka mga batang bulnerable sa dengue sanglit wala pa man sila makasinate kun mataptan sa maong balatian kaniadto kun ang gitawag nga ‘sero-negative’ nga hut-ong sa mga vaccine patients?
Tinood kaha nga ang bakuna anaa pa karon sa gitawag nga ‘experimental stage’ diin daw gihimong ‘testing ground’ lamang ang kinabuhi sa atong mga inosenteng kabataan?
May lama kaha sa kamatuoran ang kasayuran nga bisan ang World Health Organization kun WHO mismo niadtong July 2016 wala mo-rekomendar sa maong bakuna uban ang pag-ingon nga ang Dengvaxia “may be ineffective or (will) theoretically increase the risk for severe dengue illness’” niadtong wala pa ma-igo sa dengue apan gipabakunahan na ubos sa maong kwestionableng programa?
Tinood ba kadtong taho nga ang maong bakuna anaa pa sa gitawag nga ‘experimental stage’ ug nakabaton pa lamang sa ‘partial recommendation’ sa dihang gi-aprobahan sa kanhi-ay Aquino regime?
Kinsa kaha ang manubag o mga tawong angay manubag niini? Unsay angay natong buhaton aron pagsalbar sa libo ka libong kinabuhing malagmit nabutang karon sa makalilisang nga kahimtang gumikan lamang sa pagpapabaya or dayag nga kabuang sa mga anaa sa katungdanan?
Tutok lang ‘bay sa mga detalyadong taho denhe sa inyong ‘#1 Most Kinaham’ nga sibyahanan aron dungan natong mahibaw-an ang kinatibuk-ang kamatuoran mahitungod sa Dengvaxia.
RadyoMaN June Duterte
