Davao City – Nahibalik na gayud si Joanna Demafeliz….uban na niya karon ang iyang mga mahal sa kinabuhi kinsa maoy iyang gihalaran sa iyang pagpaningkamot upat ka tuig na ang nakalabay sukad nga siya nibiya sa yutang natawhan bitbit ang dakung damgo ug paglaum nga mahaw-as niya sa tumang kapit-os ang iyang mga ginikanan ug igsoon kinsa nangandoy ug usaka hamugaway nga pagkinabuhi.
Nakauli na tuod si Joanna apan sulod na sa usaka lungon ug usa na ka bugnaw nga patay’ng lawas. Ang sakit kaayong palandungon mao nga dili kasarangan ang iyang katapusan: Gi-abusaran, gi-maltratar, gidagmalan, gipasakitan hangtud nga nakabsan sa kinabuhi ug wala pa gayud matagbaw sa ilang nilu-og nga binuhatan, gitagoan pa gayud sa mga mamumunong tampalasan ang iyang cadaver sulod sa freezer nga lubnganan sulod sa usaka tuig hangtud nadugta na intawon ang iyang physical remains.
Pagkapait palandungon nga sangpotanan sa 29 anyos nga babaye kansang bugtong kasaypanan mao lamang nga siya sama sa ubang milyon-milyong Pilipino nilaum nga molampos apan diay ‘to kamatayon na hinoon ang ilang naangkon.
Gumikan niini, angay na bang ipatuman sa gobyerno ang total deployment ban sa mga delikadong lugar alang sa mga trabahanteng Pilipino?
Oo, sa mga dapit diin nagpasag ang mga insidente sa perdisyong na-eksperyensyahan sa mga palta-swerte ug gidimalas nga mga domestic helpers, mga Pinoy caregivers ug uban pang household, domestic helpers ilabi na sa mga notorious nga kanasuran sa Middle East.
Hinoon, dili tanang klase sa mga overseas employment naigo sa pagpang-abusar sanglit may mga pangempleyo man nga tarong ang mga amo kun employers sama niadtong grupo-grupo ang panarbaho sama sa mga factory workers sa Taiwan, for ehemplo ingon man sa uban pang medyo taas-taas nga matang sa panarbaho pananglitan mga skilled workers ug mga professionals.
Ako nagtoo nga angay na gayud natong undangon ang pagpadala sa mga DH ug uban pang ultimong mga household workers sanglit kini man ang pinaka-bulnerableng hut-ong sa mga kawani diin ang tan-aw sa ubang mga agalon – dili hinoon tanan – ulipon, sex slave ug ilang peyon ang OFW ubos sa ilang pagmando.
RadyoMaN June Duterte
