Davao City – Alang nako, dili justified ang gihimong pagbunal sa duha ka mga pulis ngadto sa mga menor de edad nga unang gikustodiya gumikan sa kalapasan sa curfew hour regulation dinhi sa atong dakbayan.
Wala sa Police Operational Guidelines and Procedures ang pagpasakit, pagdagmal, pagbunal o ang pag-disiplina sa pisikal nga pamaagi ngadto sa mga batan-ong adunay salaud sa katilingban kun Children in Conflict with the Law.
Ang lapses sa maong mga tinugyanan sa balaud dili gayud angay i-tolerar sa ilang mga kadagkuan ug sa entero police establishment haron dili kini sila pamarisan sa ubang mga awtoridad.
Ang mga tinugyanan sa balaud angay lamang mopailawom sa mga juvenile delinquents sa protective custody uban ang pagseguro nga ang kasal-anan sa mga batang salawayon mapaabot ngadto sa mga ginikanan aron ang naulahi na ang aktwal nga mo-disiplina sa ilang mga anak ug mga kabanay.
Mas daku ang kargo ug responsibilidad sa pamilya partikularmente ang mga ginikanan sanglit sila man gayud ang adunay direktang ascendancy ngadto sa kabataan. Ang kapulisan ug ang estado mo-entra lamang aron hulipan ang responsibilidad sa mga ginikanan kun wala nay mogunit sa maong mandato.
Gawas sa aktwasyon sa duha ka mga pulis, mas angayang mangutana kita kun unsay atong hiniusang gihimo kontra sa mga badlongong kabatan-onan sa atong panahon karon.
Unsa may atong gihimo kontra sa mga CCL kids haron dili sila magkinabuhi sa kinabuhing kalsada kun pagka-sanggano aron maundang na ang youth gangsterism, youth gangs ug riots ug aron maundang usab ang uban pang dautang impluwensya ngadto sa kabatan-onan sama sa bad influence nga mga barkada, bisyo, pre-marital sex, teenage pregnancy, unwanted pregnancy ug uban pa?
Dili lamang kini tahas sa pulis: Labaw sa nga tanan, iya kining kargo ug responsibilidad primarily sa parents kun mga ginikananan ug sa pamilya. Ang atong mga kabatan-onan reflection lamang sa matang sa atong sosyedad diin diha kanila makita ang atong hustong pagtagad o bin ba kaha ang kakulang sa atong pagtunol kanila sa prayoridad.
RadyoMaN June Duterte
