Davao City – Gipangandoy natong tanan nga mahiabot gayud ang tamang panahon diin kitang mga ginikanan maka-ingon nga ‘hay salamat’ og dili na ‘ta mabalaka nga atong mga kabatan-onan ug mga kaanakan mahitumpawak sa impluwensiya sa iligal nga droga.
Ako usab isip usaka ginikanan nangaliya nga ugma damlag, ang nasud-Pilipinas matawag na gayud nato sa hingpit nga usaka ‘drug-free country’ sa Asya ug sa kalibutan.
Ang pangutana: Unsay angay natong buhaton – ang mga namunuan ug kitang mga ordinaryong katawhan – haron ma-establisar nato ang usaka lokalidad nga nakalingkawas na sa droga?
Daghan ‘ta’g angay buhaton ug hikutaron: Ang gobyerno gihagit gayud nga dili lamang mohunong paglutos sa mga gagmay’ng drug personalities kon dili lahuson ug larason kadto gayung punuan sa tanan, ang ugat-hinungdan, ang tinubdan sa droga, ang mga dagkung financiers, traffickers, druglords, protectors ug mga kakonsabo sa sindikato.
Sundogon nato ang gihimo sa mga anti-narcotics operatives sa South America diin nagmugna gayud sila ug ispesipikong grupo sa mga warriors kun operatives nga drug neutralization lamang gayud ang ilang solamenteng misyon.
Apan likayan usab nato ang dugoong sangpotanan sa maong drug war pinaagi sa pagseguro nga atong pakusgan usab ang preventive aspect, massive rehabilitation and normalization sa mga dinakpang aduna pay tsansang makorehian.
Diha ‘toy usaka higayon diin usa nako ka higala nagtug-an nga daghan siya’g mga kaila o higala lakip kadtong mga OFWS nga nakadecidir nga denhe sa dakbayan sa Davao pa-eskwelahon ang ilang mga anak sanglit denhe mas kampante sila nga ang ilang mga anak makahuman gayud sa pagtungha sa kolehiyo ug makalikay sa bisyong droga nga moguba sa kaugmaon sa bata.
Alang nako, indikasyon lamang kini nga bisan mga ginikanan buot gayud nga maseguro ang pag-estudyo ug pagtubo sa ilang batan-on kontra sa pinakadaku nga hulga sa maong sektor karon: Way lain kon dili ang droga.
Paningkamotan ‘ta nga kining gobyernoha molampos sa gipangandoy niini nga katukoran sa usaka ‘zero drug incidence’ sa atong nasud nga gipangga.
RadyoMaN June Duterte
