Davao City – Kasama, tugti nga akong subli-on ug pagpadayag kaninyo ang nahimo natong editoryal sa atong tulumanon niadtong Abril 2, 2018 gititulohan ug ‘Balota ug Botante’ sa dihang gihatagan nato ug igong bili ug pagtagad kining sagradong katungod sa katawhan nga siya maoy mamahimong labing mahukmanon diha sa pagpili sa mga lideres nga buot niyang i-kolokar sa pwesto.
Ania ang atong subling opinyon nianang bahina:
Sa usa ka demokrasya, giilang importanteng haligi mao ang gitawag nga ‘peaceful transition of power’ kun ang hapsay ug hilway nga pagbalhin sa poder gikan sa kamot sa mga tali-tapos na nga liderato ngadto sa kamot sa mga bag-ong hut-ong sa mga opisyales kinsa maoy bag-ong gisaligan sa katawhan kun sa haring lungsod.
Dili nato ibale-nada ang nagsingabot nga May 14 election: Kritikal kaayo kini sanglit ang kabarangayan mao man sa tinood lang ang matawag nato nga ‘first line of defense’ sa mga lungsuranon when it comes to effective local governance.
Ang eleksyon sa barangay kalakip ang pagpili sa mga bag-ong representante sa Sangguniang Kabataan mao gayuy makonsidera nato nga ‘most basic, grassroots elections’ busa mas makaayo alang sa kahimsog sa atong demokrasya kun ang atong palingkuron sa pwesto kadto lamang gayud nga angayan.
Posibleng molansad sa ilang kandidatura kadtong mga kandidatong gipaluyuhan sa narco supporters kun drug money apan sayri nga kitang katawhan mao may labing mahukmanon sanglit kita man ang naggunit sa balota ug kita mang mga botante ang aktwal mopatik sa pangalan sa buot natong magdala sa tingog ug renda sa entero barangay ngadto sa mas hayag ug masanagon nga ugma.
Nan, akong subling gidasig ang matag residente sa barangay: Gamiton nato kining talagsaong gahum ug higayon ubos sa atong Konstitusyon diin kita maoy mamili kinsa ang hinginlan ug hikawan sa atong bililhong boto ug kinsa usab ang deserving sa espesyal nga pribilehiyong manerbisyo sa tawo ug sa lungsod.
Ako nanghinaut nga dili kita masayop sa dihang kita tawgon sa higayon aron mamili: Hinaut nga sa dihang atong isulat ang pangalan sa kandidato, dili kwarta, popularidad or pabor ang nagtukmod kanato sa pagdesidir sa ingon, kon dili solamente ang atong hingpit nga pagsalig nga sila kadtong adunay igong katakos ug kaligdong nga mangalagad ngari kanato.
RadyoMaN June Duterte
