Davao City- Adunay nangalipay aduna usay gitugkan ug hubag-hubag dihang nadunggan asang dapita or asang lungsura sunod madestino si Chief Insp. Jovie Espenido.
Kay sa mga dapit diin siya na-assign, may mga insidente man ugod diin nakabsan gayud sa kinabuhi kadtong mga pinangita sa balaud hinungdan nga adunay mga makapangutana istilo ba gayud kuno kini sa decorated apan kontrobersyal nga police officer?
Dili ‘ta makatubag niana gawas na lamang sa paglantaw didto mismo sa mga pulong gikan sa baba ni Espenido sa dihang siya gi-interview sa mga tigbalita kun unsay iyang mensahe ngadto kang Iloilo City Mayor Jed Patrick Mabilog sa hugon-hugon nga siya didto ma-assign sa lugar sa mga kaigsoonan natong Ilonggo:
Matud ni Espenido, kun walay siya dautang binuhatan, wala siyay (Mabilog)angay kabalak-an. Buot ipasabot, kun involved siya sa droga, nan angay lamang gayud siyang lubat-lubatan!
Si Espenido hero or bayani ba o siya usaka berdugo sa gobyerno diha sa kampanya kontra sa iligal nga droga?
Kun atong lantawon sa perspektibo niadtong dakung uyon o pabor sa kampanya versus illegal drugs, klaro nga ang hefe sa kapulisan sa Ozamiz makonsidera nga leading figure sa anti-narcotics drive sa nasud.
Apan sa mata niadtong tawo kun hut-ong sa mga tawo kinsa nanganting mosupak sa administrasyon sa bisan unsang punto-hisgotanan, si Espenido maoy hatchet man kun matadero sa gobyerno tugbang ngadto sa mga druglords ug high-profile drug personalities nga malisud lutoson sa naandang sistemang legal.
