Davao City- Sa dihang atong napaminawan ang Senate Hearing kagahapong adlawa aron pamatud-an kung may kalambigitan ba gayud ang anak sa Presidente nga si Vice-Mayor Pulong Duterte ug si Atty. Mans Carpio sa smuggling, shabu shipment ingon man corruption diha sa Bureau of Customs, karon, ang publiko mamahimo nang mohatag sa atong hukom.
Ang pagtim-aw sa batan-ong Duterte sa Senado nagpakita lamang nga andam ug tagana siya nga hinloan ang iyang pangalan. Sa akong personal nga lantaw, dili pupaigo ang mga ebidensiya nga gipagawas ni Sen. Trillanes aron pamatud-an ang iyang mga alegasyon ngadto sa batan-ong Duterte.
Ang bug-at nga mga alegasyong gibuhian ni Trillanes nanginahanglang usab og bug-at mga ebidensiya. Sa balaod, dili kita mamahimong magmugna-mugna na lamang og mga malisyusong panghuna-huna ug basta-basta na lamang hugaw-hugawan ang imahe sa usaka tawo. Gani makapangutana kita, unsa ba gyud kaha ang tumong sa gipabuhagay nga mga isyu ni Trillanes?
Karon nga hinlo ug nasalbar na ni Pulong Duterte ug Mans Carpio ang ilang pangalan, angay kitang moabante sa unahan.
Sa padayong pag-imbestiga kung sila kinsa ba gyud kining mga nagpaluyo sa mga binuhatang iligal. Di ta angay masaag sa tumong sa gihimong hearing sa Senado.
Angay manubag ug masilotan kining mga nagbinuang sulod sa gobyerno. Kung magpadayon kining pagpasulod og druga dinhi sa nasud ug binuhatan pa gayud sa mga anaa sa gobyerno, dako kining laparo sa anti-drug campaign sa Duterte administration. Daghan na’ng kinabuhing nakalas, dakong pundo na ang gigahin alang sa paghunong sa iligal nga druga. Di nato tugtan nga makawang lamang kining tanan.
Kasamang Misel Miral
