Davao City- Kun tinguha nato ang pagpaundang sa kriminalidad ug kasamok sa atong katilingban, unahon nato pagpuo ang pagkuyanap sa mga loose firearms gikan diha sa kamot sa mga dili angay mogunit sa mga armas de fuego.
Walay dautan kun maglusad kita ug gun ban apan sagad man gud sa matutukan niini mao lamang kadtong mga legitimate gun holders.
Sagad niadtong mohimo sa buhat nga dinautan dili gayud kana magpailawom sa regulasyon, tingali ang mas angayang buhaton mao nga dinha targeton sa kampanya kadtong mga dautan sanglit kini man sila ang malambigit mogamit sa mga epektos alang sa pagpamusil, pagpang-holdup or bin ba kaha pagpanghasi sa ilang mga kaatbang kun mga kalaban.
Kun buot natong ipatuman ang usaka gun-free society, apilon nato ang mga dagkung tawong sagad untouchables kun hisgotan na gani nato ang krusada paglutos sa mga iligal nga hinagiban.
Sugdan nato dinha sa mga criminal elements, mga syndicate members, private armies, rebeldeng grupo ug kadtong gawas sa rueda sa balaud sa atong katilingban.
Ang pangutana: Kaya ba natong gukdon ang mga ma-impluwensyang sagad adunay kaugalingong private armed groups?
Gikinahanglan usab nga kun maglusad ‘ta ug kampanya, dili lamang panahon sa eleksyon kon dili, 24/7 gyud unta ug 365 days a year.
Laktod pagkasulti, kampanya kini nga walay undang kun pagkutat – dili krusadang subang-subang lamang or papogi lamang aron ingnon nga kunohay naa tay gibuhat.
RadyoMan June Duterte
