Davao City – Duha na lamang ka tulog, magbag-ong tuig na ‘ta. Maoy akong personal nga pangaliya nga unta kun unsa man ugaling ang grabeng kalisud nga atong nasinatian karong tuiga, sugaton nato ang usaka mas hamugaway nga tuig 2018.
Karong tuiga man gud, dili basta-basta ang atong nasinatian nga mga hulga sa atong pamuyo, sa atong kahusay ug kalinaw, sa atong kinaiyahan, sa mga krimen nga nagapanghitabo nga daw gikuso-kuso gayud kita’g maayo.
Apan magpasalamat ‘ta sa Kahitas-an nga nilahutay kita kutob ning mga tungora, nga nakalingkawas ‘ta sa kapit-os, nga bisan pa man kun may mga higayon diin naigo kita sa katalagman, nga luwas kita gikan sa klarong peligro ug perdisyon.
May mga kakulangon gayud kita sa atong kinabuhi, dili nato kana matipigan o matapin-an sanglit kana usa man ka kamatuoran apan dili kana angay maghikot kanato nga dili na kita makalabang pa sa unahan.
Gamiton nato ang atong mga mapait nga kasinatian sama sa Roxas Night Market Bombing, Krisis sa Marawi gumikan sa terorismo, bangi-pulitikal tali sa mga naghupot sa pwesto ug mga kaatbang sa baruganan, bagyong si ‘Urduja’ ug si ‘Vinta’ ug uban pa nga angkla sa bag-ong inspirasyon sa pagtikang sa 2018.
Nawad-an man kita sa mga bililhong butang ug kabtangan, pasalamat ‘ta sa Diyos nga padayon ‘ta Niyang giiway sa malisud kaayo nga dalan sa kinabuhi.
Ug sa 2018, sandig pa gayud kita’g mas maayo sa landong sa Kalangitan diin walay bisan unsang bagyo o pagsulay ang mobuntog sa atong kaseguruhan (Psalm 91:1).
Mga panghinaut alang sa malinawong kasaulogan sa atong tinuig nga Media Noche – Happy, Happy New Year to All!
RadyoMaN June Duterte
