Davao City – Daghan ang maayong hatod nga benepisyo sa modernong teknolohiya sa atong kinabuhi gumikan sa pagpadali sa pagpangalap pananglitan sa lab-as nga mga impormasyon haron magsilbing basihanan usab sa atong mga aksyon nga pagatomaron.
Usa sa adunay dakung epekto sa atong inadlaw-adlaw’ng panglihuk-lihuk mao kining internet, presensya sa social media ingon man mga modern applications nga nagapasayon sa atong mga buluhaton apan aduna usay bitbit nga mga negatibong implikasyon.
Gane, establisado na karon ang mga insidenteng cyber bullying, cyber addiction ilabi na sa mga adult kun mature sites, social media and online gaming addiction ug uban pang mga bisyo.
Dakung hagit karon nga taliwala sa kaayuhan sa internet, magbutang gayud kita ug limitasyon kun regulasyon aron mapugngan ang nanghingapin nga pagpatuyang sa tawo sa maong mga modern influences.
Daku gayud ang papel sa mga ginikanan silbing ‘first line of defense,’ mga magtutudlo diin mas daku ang oras nga gigahin sa mga tinun-an sa entero nila nga adlaw diha sa ilang mga eskwelahan, sa gobyerno kinsa maoy mopanday sa hugot nga mga reglamentos aron dili maabusaran ilabi na sa mga kabatan-onan ang pag-utilisar niini.
Tingali adunay dakung panginahanglan aron kadtong mga anaa sa poder mopatuman sa mas hugot pa nga pagdili sa way pagkutat nga paggamit sa net nga inay makaayo, mosangpot na hinoon sa dautan diha sa tawo.
RadyoMaN June Duterte
