Davao City – Pila ka mga Labor Day na ang milabay, hangtud karon, nagpabilin sa gihapon ang mga problemang giatubang sa katawhang Pinoy diha sa atong pagpangempleyo.
Usbaw sa panuholan, pagwagtang sa kontraktwalisasyon, paghatag og daghang trabaho, ug daghan pang uban – kini ang atong padayon nga panawagan sa atong panggamhanan. Gani pila ka mga administrasyon na ang milabay, anaa gihapon ug nagpabilin gihapon ang nasangpit nga mga problema.
Matuod gayud nga lisod ipaigo ang dyutay nga kantidad sa arang kamahal nga presyo sa mga nag-unang palaliton. Tinuod nga ang sweldo ni Tatay kulang ra gyud intawon sa mga panginahanglan sa mga anak diha sa ilang pagtungha. Tinuod sab nga lisod kaayong mangita og trabaho karong panahona kay di man sab basta-basta ang qualifications sa matag-kompanya.
Samtang padayong ginahimoan og solusyon sa gobyerno kining atong mga mulo, gani bisan unsa na lamang nga mga programa ang gihimo og gisulayan sa panghinaot nga masulbad na gyud kining atong panawagan, dili man usab pwede nga magpaabot ra kita kung kanus-a nila masulbad kining tanan. Basin unya og sa pag-abot sa panahon nga masulbad na kini, wa na sab kita ibabaw sa kalibutan. Kung kanus-a, wa ta masayod. Ug kung masulbad ba gyud kaha, mao kana ang dakung pangutana.
Isip usaka batan-ong trabahante, nagtuo ako nga angayan kitang mouban sa bul-og sa tubig. Sa panahon karon, daghan nang mga kausaban. Pipila niini ang presensya sa bag-ong teknolohiya. Buot ipasabot, nag-usab na sab ang demand sa mga trabaho nga gikinahanglan sa mga nagtukod og negosyo.
Sa akong personal nga lantaw, ang atong seguridad sa pagpanarbaho wala lamang nag-depende sa suporta nga ikahatag sa gobyerno o sa sweldo nga ihatag sa atong mga amo, apan ako nagtuo nga ang atong seguridad, anaa sa kalidad sa atong pagtrabaho. Kita mismo ang mohatag og solusyon sa problema nga atong giatubang karon. Sakripisyo, kugi ug lahutay: kini nga mga hiyas ang alang nako angay natong batonan aron sa dihang mag-usab-usab man ang dagan sa kinabuhi, mobarug kita dili lamang isip usaka trabahante apan isip usaka tawo.
Buot kong ipaabot ninyong tanan, kita nga mga trabahante kinsa naningkamot alang sa atong mga pamilya, ang akong kinasing-kasing nga pagsaludar kaninyo nga bisan pa man sa kadaghan sa atong problema ug sitwasyon sa pagpanarabho karon, nagpabilin kamong lig-on tungod ug alang sa inyong mga minahal sa kinabuhi. Bisan og dunay mga kapait ug kalisod, anaa kamo karon sa inyong nahimutangan, nagtrabaho, nagkugi, bisan sa kapait ug kalisod, nagpabiling lig-on tungod sa tinguha nga molahutay sa matag-adlaw. Niining tanan nga atong naagiang kalisod, dili ang atong napundar gikan sa atong sweldo o ang bisan unsang material nga butang ang atong ikalipay ug ikapasigarbo, apan ang atong karakter isip usaka mamumuo. Nagbarug ug nagpabiling lig-on luyo sa tanang kalisod. Saludo ko ninyo mga Kasama!
RadyoMaN Misel Miral
