Davao City – Sa makausa pa, atong gi-awhag ug gi-agni ang tanan nga mangandam ug magpreparar sa klase-klaseng mga katalagman nga malagmit atong masinatian una pa man hingpit manamilit ang tali-human nga tuig 2017.
Ania pa sa atong kiliran si ‘Urduja’ apan daw nagbuntaog usab sa unahan ang uban pang mga bagyo sama nila si ‘Vinta,’ ‘Wilma’ ug si ‘Zoraida’ alang ning tuiga.
Pangandaman nato ang grabeng pagbundak sa ulan ug ang posibilidad nga pagdahili sa mga humok nga kayutaan sa kabukiran ug ang pag-overflow sa atong mga kasapaan ug kabaybayunan nga malagmit usab mosangpot sa pagbaha sa atong mga komunidad ug perwisyong hatud niini sa atong seguridad mismo sa atong tagsa-tagsa ka mga kinabuhi.
Denhe sa kinapusuran sa dakbayan, anaa ang sitwasyon sa grabeng paglanap sa tubig-baha nga motampo usab aron mas mograbe pa ang hinay nang daang dagan sa panakayan gumikan sa arang ka-traffic nga kadalanan.
Gawas sa bagyo ug baha, anaa pud usab ang posibleng pagtay-og sa kayutaan ug susamang mga kalisud hinungdan nga paningkamotan gayud nato nga andam ug hitsas ‘ta sa bisan unsang matang sa katalagman.
Ning modernong panahon, dili alibi nga wala ‘ta masayud kun ma-inpormar nga nagkaduol na diay pananglit sa atong lugar ang makusog nga bagyo. Kun mao kana, angayang molihuk gilayon kita aron mo-bakwit ensigida sa mas luwas nga mga dapit ug dili kay pugson pa ‘ta sa mga awtoridad nga mobiya pinaagi sa forced evacuation.
Hingpit usab natong gi-awhag ang atong mga kadagkuan nga hugot ipatuman ang mga konkretong anti-calamity measures sama sa ‘no build zones’ sa mga calamity-prone areas, ang pagdili sa katukoran sa mga gambalay ug mga istruktura sa mga lugar nga ‘reserved for environmental and ecological protection and reservation’ ug kadtong gi-identifica na nga ‘landslide and flood-prone areas.’
Karon ang hustong panahon sa paglikay sa atong kaugalingon gikan sa tino nga disgrasya – dili kanang oras diin nag-atubang na kita sa arang kadaku ug nag-umidong trahedya nga wala na ‘tay kapaingnan o kadaganan pa!
RadyoMaN June Duterte
