Davao City – Maanindot ang konsepto kun ideya nga free enterprise kun kining sistema sa gawasnon nga pagnegosyo apan gumikan lagi sa presensya sa mga bentahosong trader kun komersyante, angay lamang usab natong ipamugos kun ipamursigi nga kitang mga yanong konsumante mapanalipdan sa tanang panahon gikan sa kamot niadtong buot mamerwisyo kun mamiktima kanato pinaagi sa pagpamentaha.
Ang padayung pagsaka sa presyo sa mga nanag-unang palaliton sa merkaduhan makonsidera nato karon nga dakung palas-onon kun kalbaryo sa ordinaryong tawo.
Obligado ang estado nga gamiton ang makinaryas sa gobyerno aron depensahan ang interes sa mabagang duot sa katawhang pobre, kabus ug timawa uyamot kinsa matawag nato nga kakha-tuka kun nabuhi sa gitawag nga ‘hand-to-mouth existence’ nga kun walay kakha-on, wala usay kan-on intawon.
Dili kini bag-o nga sugyot kun suhestiyon apan ako na lamang usab nga subli-on gumikan gikinahanglan na kaayo sa panahon: Urgent na kaayo karon nga magbutang kita ug usaka sistemang price control or price watch haron ang interes sa mga konsyumer maprotektahan sa hingpit.
Sugyot usab nako nga atong ibalik ang karaang ahensyang Price Stabilization Council kinsa tahasan sa pag-regulate kun pag-referee sa aksyon sa negosyante nga pausbawan ang presyo sa ilang mga baligya aron dili kini mopatay sa kapasidad sa pobreng tawo nga makapalit sa presyong affordable aron buhi-buhi kitang tanan.
Ikatulo nakong hagit buot nakong idirekta ngadto sa katawhan kun sosyedad mismo nga atong banhawon kun pabarugon pagbalik ang mga pro-consumer advocacy groups or watchdogs sama kaniadto sa Kunsumo Dabaw nila ni Rey Magno Teves, Weni Gorres, Paking Tesorero, Nonoy Librado ug City Councilor Pilar Braga kinsa maoy daling kadangpan niadtong buot moreklamo kontra sa pagpasulabi sa naghawid sa kapital ug negosyo.
Gikinahanglan na nato karon nga adunay tigbalanse sa nagkabangi nga intereses sa negosyanteng buot mo-ginansiya ug sa ordinaryong tawo kinsa limitado lamang gayud ang iyang rekursos diha sa pagpangabuhi.
RadyoMaN June Duterte
