Davao City – Mga Kasama, kaseguruhan ba nga kun edukado ang usaka kandidato, mas matarong ug may igong kaligdong ang iyang pamunuan lokal man o nasyunal?
Nagpasabot ba nga kun mubo lamang ang lebel sa edukasyon intawon sa usaka tawo, haguka ug dili na hitsas ang iyang pangatungdanan?
Alang nako, bentaha kun ang usaka buot molansad sa iyang kandidatura kadtong may igong kahibalo sa panggobyerno nga sagad makuha nato diha sa pagtungha ug pagtoon sa mga pamaagi sa panerbisyo ug pangatungdanan.
Kay kun wala man guy igong kahibalo o kinaadman ang usaka kandidato, moabot ang panahon nga siya magkalisud o bin ba kaha magkapuliki sa paghimo sa iyang mandato gumikan sa nasangpit nga mga kakulangon.
Apan andam usab akong mopadaplin ning akong gituhuan sanglit ang kasaysayan puno man sa istorya ug sugilanon sa mga nagmalampuson nga mga ubos lang ang nakab-ot nga edukasyon, mga out-of-school youth, mga college dropouts: Kini sila nakahimo sa paglatas sa maong limitasyon pinaagi sa kinaugalingon o personal nga pagtoon ug pag-edukar sa ilang mga kaugalingon.
Alang nako, daku’g ikatabang ang diploma, Transcript of Records ug uban pang academic credentials sanglit nagpakita ug nagpamatuod lamang kini nga ang naggunit sa maong mga kwalipikasyon niagi ug dili basta-bastang pagsulay sa pagkab-ot sa edukasyon pinaagi sa disiplinadong kinabuhi.
Apan kun wala kana, angay abli ang gobyerno under special circumstances pananglit kun adunay hataas nga kasinatian ug maayong track record of performance ang nasangpit nga mga kandidato.
Mas mahinungdanon ug bililhon gihapon nga gawas sa educational attainment, dalaygon ang binuhatan, walay pagpasulabi sa poder, dili korap ug may matuod nga kasingkasing alang sa pagpangalagad sa katawhan sa barangay.
Akong gihagit ang mga nakatenirug taas nga pagtoon nga moboluntaryo alang sa lungsod gamit ang katakos ug kinaadman nga gigasa sa Kahitas-an kanila.
Gihagit usab nako kadtong mga palta-swerteng wala makatungha ug medyo taas-taas nga lebel nga ipakita nga bisan kun dili sila college degree holder, wala magpasabot nga dili sila edukado – sanglit ang matuod nga edukasyon dili man lamang mabatonan sulod sa upat ka suok sa eskwelahan: Makab-ot usab kini sa gitawag nga ‘University of Hard Knocks.’
RadyoMaN June Duterte
