Davao City – Karon nato matestingan kun masukod ang kamatinud-anon sa atong mga kandidato sa May 14 elections ug kun sila ba masaligan sa tanang butang.
Karon nato mahibaw-an kun aduna ba silay igong pagtamod kun pagrespetar sa mga lagda sa balaud sa eleksyon, pananglitan kining reglamento kalambigit sa common poster areas.
Kun kaantigo silang mosunod sa maong regulasyon, kana nagpamatuod lamang nga sila nasayud sa importansya sa pagpadangat og mensahe ngadto sa tanang mga botante diha sa pagka responsable kun ang hiyas nga pagka-masaligan.
Sa pikas bahin, kun sa pinaka simple ug labing yanong rekwisito dili na gani makapakita ug pagtahud ang usaka kandidato, unsa pa kaha sa mas dagku nga klase sa pamalaud?
Ang common poster area, ang campaign period, ang campaign finance pulos kini mga regulasyon haron patas ang rueda sa piniliay pinaagi sa gitawag nato nga ‘level playing field’ haron walay manobra kun magpasulabi sa ilang pagpangampanya.
Busa, dakung hagit karon ngadto sa mga awtoridad sama sa COMELEC ug sa DILG nga ipakita gayud ngadto sa katawhan nga kun adunay mga malapason, aduna gayuy pagasilotan haron mabura nato kana bitaw’ng impresyon sa tawo ba nga maayo ra ‘ta sa sulti, maayo ra ‘ta mamaba apan talawan ‘tang mopatuman sa pagpanakop ug mosilot sa angay dakpon ug silotan nga mga arang kasirok, kabentahosong mga kandidato ning eleksyon sa barangay karong Lunes.
RadyoMaN June Duterte
