Davao City – Kun adunay usa ka kampanya nga magsilbing dakung legasiya sa Duterte administration nga malagmit ikabilin niini ngadto sa mosunod nga henerasyon kun kaliwatan, kana mao ang war on drugs.
Kini nga programa ug prayoridad makonsidera nato nga talagsaon sanglit kini ra nga administrasyon ang naghimo niini nga ‘centerpiece program’ diin dakung pahat sa rekursos ug enerhiya sa pamunuan gibubo niini diha sa maong maisogong kampanya.
Sa mga loyalista ug nagsalig ug husto sa rehimeng Duterte diha sa drug war, ang ‘Tokhang Revived’ gikonsidera nga pagpamatuod nga may igong katakos ang liderato nga konprontaheon ang usaka kumplikadong suliran kun dilemma nga sa taudtaud nang panahon nahimong albatross kun dakung palas-onon sa abaga sa mga namunuan ingon man sa entero katilingban.
Apan ang Duterte drug war mahinumdoman diha sa atong kasaysayan paglatas sa daghang mga katuigan depende sa mamahimo unyang dugokan niini.
Kun mahitabo sa gihapon ang gi-akusar kaniadto nga extra-judicial killings, matawo unya ang impresyon sa tawo nga ang drug campaign diay usaka matang sa ‘juez de cuchillo.’
Kun molampos ang mga tinugyanan sa balaud sa pagtono ug tarong ning maong kontrobersyal nga krusada, nan hinanok kitang mahikatulog nga walay inosenteng madamay ug nga kadto lamang nga lulong na gayud sa bisyong narkotiko ang ciertong mahitumpawak sa kaala-otan ilabi na kun dili gihapon mag-usab sa ilang kaugalingon.
Sa atong mga law enforcers, ako nanghinaut nga padayon ninyong ibandila ang hustong pagpatuman sa tanang lagda sa balaud samtang hugot nga gipatuman ang inyong mandato ug responsibilidad pagpatunhay ning atong katilingban.
Ako padayon nga manghinaut nga mapakita nato sa entero kalibutan nga ang mga Pilipinong law enforcers dili lawbreakers kon dili role models sa hustong pagpatuman sa reglamento base sa balaud.
RadyoMaN June Duterte
