Davao City – Gumikan sa atong talagsaong lokasyon dinhi sa kalibutan, nahimo na gayud nga normal natong kasinatian sa Pilipinas ang nagkadaiyang mga kalamidad, trahedya, emerhensiya ug katalagman.
Dili na ‘ta estranghero sa mga dili maayong panghitabo sama pananglit sa linog kun pagtay-og sa kayutaan, pagbaha, landslide o bin ba kaha pagbusikad sa bulkan sama sa Mt. Mayon explosion karon.
Ug kay wala na man kitay mahimo sa atong nahimutangan, nan ang hagit na lamang kanato mao ang pagseguro nga luwas kitang tanan sa paghaguros niini.
Importante kaayo nga aduna kita nianang kumpletong inpormasyon kun kasayuran haron ang tawo makaikyas gilayon sa agianan pananglit sa lahar flow, sa flashflood o sa pagdahili sa yuta nga mamahimo kaayo natong ikamatay kung magdinanghag ‘ta.
Ug sa dihang cierto na ‘ta sa nasayran, nga dili na ‘ta magmagahi pa sa pag-evacuar sa mas luwas nga kapaingnan haron temporaryamenteng mapanalipdan ‘ta sa kamangtas sa kinaiyahan.
Ug nga sa dihang anaa na kita sa mga evacuation centers, unta hitsas kini sa tanang panginahanglanon sa mga bakwit sama sa igong supply sa mga pagkaon, tubig-mainum, gatas sa mga batang masuso pa, supply sa tambal alang sa first aid, presensya sa mga responders ug caregivers kinsa maoy mopa-alibyo sa gibating kahadlok ug kaguol sa mga maapektuhan sa trahedyang wala kitay ikasugakod kun ikasarang.
Kopyahon nato ang Japan kinsa dawat na nila ang realidad nga sila main highway gayud sa mga natural calamities mao man gani nga gi-preparar na niini ang iyang mga lungsuranon nga molihuk gilayon sa unang senyal pa lamang sa dili kasarangang hitabo sa palibot.
Sundon nato ang mga Hapon diin bisan taliwala sa mga kalamidad, disiplinado gihapon sila bisan diha sa mga relief centers, walay hysteria ug bisan pa sa paglinya ug single file diha sa pagpangayo ug asistinsya ug usab walay nahitabong food rioting dili sama sa ubang kanasuran diin gubot kaayo ang mga evacuation centers.
Dawaton nato ang atong presenteng kapalaran ug buhaton nato ang tanang mitigating measures haron kun dili man gani kita hingpit nga makalingkawas, at least man lamang ma-iban ibanan nato ang posibleng damyos ug extent of casualties nga mugna niini.
RadyoMaN June Duterte
