Davao City – Usa ako sa libo ka libong yanong Pilipinong gibati’g kabalaka matag higayon nga mogimaw ang senaryong gyera tali sa gobyerno ug sa New Peoples Army o bisan kinsang kaatbang nga pundok sanglit sa gubat, anaa gayud ang dakung posibilidad nga hasta kitang sibilyan madamay kun mapagan.
Realidad kana mao gani nga bisa’g malisud, ato gayung gipursigi ang pagbugtaw sa kalinaw gumikan kinsa bay matuod nga modaug sa gyera?
Oo, posibleng masakmit mo ang kadaugan, makuha ang pwesto o liderato or mahinginlan mo ang mga kalaban, apan samtang gipaninguha ang maong kadaugan, pila kaha ka mga kinabuhi ang makalas ug dugo nga maula tungod lamang sa gipangandoy kunohay natong kalinaw.
Dili nato mabasol ang Duterte regime nga mogunit na sa gatilyo sanglit padayon man usab ang mga pagpanghasi, pagpamatay, pagpanabdab sa NPA sa kabanikanhan. Kon kita kaha si Duterte, dili kaha buhaton usab nato ang iyang gimando sanglit wala may nakitang sinseridad sa kaatbang nga pundok nga unta ilang ka-istorya?
Kun pinal nga tinguha sa mga rebolusyonaryo ang pagpatunhay sa atong katilingban,nganong sirado man kini sa gipangayo sa gobyerno nga ‘favorable or conducive climate for peace negotiations,’ laktod pagkasulti, undang ‘sa ta’g binigwasay unta haron magdungog ‘ta sa dihang magtagbo ‘ta diha sa negotiating table.
Adunay daw naglagitom nga kalangitan ug nag-umido nga kawanangan nga akong nasiplatan sa unahan, apan dili kini angay mobalda sa atong tulin nga pagkalat sa dalan sa kalinaw. Walay nag-ingon nga dili malisud ang pagpatukod sa istruktura sa kalinaw denhe sa gubot natong nasud, mao man gani nga labaw’ng gikinahanglan nga dili kita moundang sa ato nang nasugdan bahala na’g diyutay lamang kini nga kalampusan.
Sa higayon nga paundayunan nato ang atong gibating kasuko, kahigwa-os ug kaligutgot kontra sa atong kaatbang gumikan lamang sa managkalahi ug nagbangi natong barug, postura o ideolohiya, mao na unya kana ang senyal nga natapos na ang tanan tang paglaum ug mangandam na lamang kita sa malagmit pagdanak pa sa dugo sa kumbate sa Pilipino batuk Pilipino. Pagkasubo nga hunahunaon…
Kon moabot man gani kanang adlawa unta dili, mao na unya kana ang pinakamasub-anong panahon sa atong kinabuhi. Dili nato tugtan ‘bay nga kana nga panan-awon mahitabo ug atong masinatian.
RadyoMaN June Duterte
