Davao City – Alang nako, personal judgment call sa matag usa kanato kun mohatag ba kita or dili ngadto sa mga nagapalimos diha sa atong mga kadalanan. Dili ko moingon nga ‘oo’ or ‘ayaw’ kay nagtoo ko nga mas maayong bukas sa tagsa-tagsa nato ka mga dughan kun unsa ba gayud ang atong angay nga pagabuhaton diha sa ing-ana nga mga sitwasyon.
Apan angay natong masabtan nga kun magpadayon kita sa pagtunol ug sinsilyo nganha sa mga anaa sa kalsada, ilabi na kay nalu-oy kita sa mga gagmay’ng batang nabulad intawon sa init ug uwan aron lamang magpalimos, nakabatang ba gayud kaha kita ngadto nila?
Dili kaha nga daw ato lamang gidasonan ang dautang mentalidad nga okay ra man diay nga manghasol ‘ta sa atong isig-kaingon?
Dili kaha kita madamay sa dihang ma-disgrasya na hinoon ang mga nagapanglimos gumikan lamang kay ato silang gitubayan sa ilang matang sa panginabuhi?
Dili kaha mas maayo kun atong awhagon ang atong mga tinugyanan sa balaud nga salbaron o rescuehon ang mga anaa sa kadalanan lakip na ang mga ‘street dwellers,’ mga nagatulog na lamang diha sa mga kadaplinan kay walay kaugalingong pinobreng pinuy-anan sarang kapahulayan panahon sa kagabhi-on?
Ako nagtoo nga dili kita angay bati-on ug ‘guilty feelings’ sanglit dili man kita obligado nga motabang ilabi na kun ang bunga sa atong aksyon mohatod na hinoon kanila ngadto sa bung-aw sa tinong kaparotan.
Mas makatunol kita ug undanon ug bililhong tabang kun ato silang luwason gikan sa arang kadelikadong kadalanan, unya hatagan sila ug alternatibong panginabuhi aron ilang mabatonan ang hilway ug hamugaway nga matang sa pamuyo.
Meri Krismas sa tanan!
RadyoMaN June Duterte
