Davao City – Sama sa kadaghanang mga lungsuranon ning nasura, ako usab nagtinguha nga atong mabatonan unsa ba gayud ang kamatuoran sa Dengvaxia issue nga nibulabog sa atong nasudnong programang pangkasanihan karon.
Gusto usab akong masayud kun aduna bay nahitabong salimpangkong o binuang sa dihang gipamugos sa Aquino administration ang P3.5B Dengvaxia anti-dengue vaccine mega purchase niadtong 2016.
Ako usab buot nga kadtong mga nagpasimuno niining tanan patubagon, ikiha ug kun gikinahanglan silotan gumikan sa ilang kagahaman sa kwarta ug tumang pagpabaya nga nagbutang na hinoon sa tumang kadelikado sa kinabuhi sa 830,000 ka mga Pilipinong kabataan sa Luzon ug Kabisay-an nga na-injectionan sa maong bakuna.
Ako usab buot nga ang tiggama ug tig-apud apud sa makamatay nga matang sa bakuna silotan gumikan sa ‘willful criminal neglect’ o bin ba kaha pabayron sa damyos gumikan sa pagpa-ospital ug posible pang kamatayon sa mga napabakunahan.
Angay usab silang manubag gumikan sa dili ti-aw’ng kahadlok ug kabalaka sa mga ginikanan gumikan sa way klarong kaugmaon sa ilang mga anak nga wala gani sila masayud kun luwas na ba o dili pa ang ilang mga kabataan gikan sa perdisyon.
Unsay gitudlo niini kalabot sa atong health program? Nagtudlo kini kanato nga dili gayud angay sagulan kun sambugan ug pamulitika ang usaka programang gitumong alang sa kaayuhan sa katawhan.
Sa dihang ato na ganing binuangan ang kinabuhi sa atong mga lungsuranon, mogimaw na unya ang dautang implikasyon niini sanglit makonsidera man nga usaka dakung krimen ug sala ang pagpangawkaw ilabi na kun bugti unya niini ang bililhong kinabuhi sa atong mga kabataan.
Kun ako lang ang pabut-on niana, kadtong naghimo sa ingon nga salaud angay pahamtangan sa pinakabug-at nga silot sama sa pagbitay.
RadyoMaN June Duterte
