Davao City – Suportado nako personal ang lakang nga hugot ipatuman ang usaka mas halapad, mas komprehensibo ug mas malangkubong nationwide curfew regulation alang sa atong mga kabatan-onan.
Dili na mistil pa nga isulti ngari nga kini nga matang sa direktiba makonsidera nato nga usa niadtong direktang magpugong sa kalambigitan sa mga minors diha sa mga dili maayong panghitabo sama sa krimen, droga, bisyo, barkada, premarital sex, unwanted pregnancies ingon man sa mga insidenteng teen depression, psychological and emotional disorders nga usahay, mosangko pa gayud sa pag-suicide kun pagpakamatay.
Husto na usab karon nga panahon aron atong rebyuhon ang Juvenile Justice Law kun Pangilinan Law aron balasahon, amyendahon o bin ba kaha hingpit nang ibasura ang kontrobersyal nga balaud aron dili siya himoong taming lamang sa mga batan-ong involved sa krimen kun Children in Conflict with the Law (CiCL).
Labaw sa nga tanan, karon na ang panahon nga atong idukdok pagbalik sa alimpatakan sa tanang mga ginikanan nga nag-unang kawsa sa presensya sa mga salawayong menor nga ma-involve pananglit sa youth gangs, riots dala sa gangsterism, drugs, ‘akyat-bahay,’ hold-up, rape, murder o homicide ug uban pang kalapasan mao ang kapakyas sa pagpanton kanila sa ilang mga ginikanan.
Ang distressed youth simptomas lamang sa kapakyas ning atong katilingban nga panalipdan ang mga kabatan-onan. Kun huyang ang pundasyon sa pamilya mugna sa daghang mga factors nga naghulga sa iyang estabilidad ug kalig-on, naturalmente moresulta lamang kini sa misguided youth kansang kakulang sa saktong panabot, kahimatngon ug kahibalo sa kalibutan ug kinabuhi mao ra usab ang modaut kanila.
Salbaron nato ang atong kabatan-onan gikan sa kamangtas sa dautang impluwensiyang nag-alirong kanila sa matag adlaw.
RadyoMaN June Duterte
